7 ноябрьыште Марий Элым вуйлатыше Юрий Зайцев ужашын мобилизоватлыме кышкарыште Россий Федераций Вооруженный Вийыш налме военнослужащий-влаклан да нунын ешыштлан социально полшымо йодыш дене черетан совещанийым эртарен.
Регионым вуйлатыше боец-шамычлан да нунын ешыштлан мо кӱлешым ситарыме пашам шуктенак шогаш кӱштен. Тыгак воинский частьлаште але специальный военный операцийым эртарыме кумдыклаште улшо военнослужащий-влакын нӧлталме чыла йодышыштым шке контрольышкыжо налме нерген ойлен.
«Мемнан дене мобилизоватлыме-шамычын ешыштлан социально полшымо шуко йӧн уло. Тыгодымак военнослужащий-влакын тунемме рӱдерлаштышт организационный ма материальный шотан могай ситуаций, проблеме, кӱлешлык улмым умылыман. Можыч, ала-кушто выплатым пуэн шуктен огытыл – чыла тидым рашемдаш да лончылаш кӱлеш», – паша радамым палемден Ю.Зайцев.
Марий Эл правительстве председательын алмаштышыже Степан Воронцов Россий президентын Ужашын мобилизоватлыме нерген указше дене келшышын эртарыме паша дене палдарен да регионым вуйлатышын военнослужащий-шамычлан кӱлешан вургемым, инвентарьым, снаряженийым ситарыме шотышто шындыме задачыжым тичмашнек шуктымо нерген ойлен.
«Таче кечылан мобилизоватлыме-шамыч деч Ульяновск область гыч йодмаш уло. Тудым 85 процентлан уже ямдыленна, вӱргечын машинашке оптен колтена. Пасу условийыште илен лекташ мо кӱлеш гын, чылажымат – ноутбук гыч тӱҥалын, кольмо, изоленте, кабель да лампычке марте – шотыш налынна. Тылеч посна але границе воктенысе полосалаште, але спецоперацийым эртарыме кумдыклаште задачым шуктышо военнослужащий-влак деч ныл йодмаш уло. Изарнян, 10 числаште, 12 шагатлан республиканский колоннына МВД, тыгак Курыкмарий районын да Волжск олан администрацийышт дене пырля тарвана. Нуныланат гуманитарный полышым колтена», – радамлен С.Воронцов.
Марий Элым вуйлатыше шке порысым шуктышо военнослужащий-шамыч нергенат шарнаш кӱлмым ушештарен. Ю.Зайцев нунын йодмашлаштым иктешлаш да Рӱдӧ военный округын командованийжым палдараш кӱштен.
Военнослужащий-влаклан да нунын ешыштлан полшымо йодыш правительствын еҥже ден муниципалитетлам вуйлатыше-влакын кугу тӱткышыштышт лийшаш, совещаний мучаште палемден Ю.Зайцев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
