Кодшо кеҥежым Шернур посёлкын ик уремже дене эртен кайымем годым йошкар кермычан пӧрт воктене мотор пеледыш-влакын кушмыштым шекланышым. «Могай сылне!» – шоналтышым тунам семынем. Ты сурт воктене шошым, кеҥежым да шыжым шинчам тӱрлӧ пеледыш эре куандара.
Ты моторлыкым ончен куштышо еҥ дене лишкырак палыме лияш кумыл лекте. Тыге ме Йошкар-Олаште ик мероприятийыште тений вашлийынна. Тудо эше волонтёр сомылымат шукта улмаш. Мутем тачысе унана – Маргарита ТОКТАРОВА нерген.
– Жапет поро лийже, Маргарита. Палем, тый пеледышым ончен кушташ йӧратет. Пӧрт воктенет эртен кайыме годым кажне еҥын кумылжо нӧлталтеш, очыни. Тиде сомыллан кузе шӱмаҥынат?
– Пеледышым мый изинек йӧратем. А ончен кушташыже ныл ий ончыч тӱҥалынам. Мылам утларакшым петуний келша. Тудым ӱдаш, черенковатлаш лиеш. Вигак пеледалташ тӱҥалеш, жуко жап вучыман огыл, тыгодым моторлыкшо дене кеҥеж мучко куандара. Тыгак петунийым кӧршӧкыштат, йыраҥыштат кушташ йӧнан. Тылеч посна хризантеме пеледыш кумылем вӱчка. Тудо йӱштӧ толмешке пеледалтеш.
Чынжым каласаш гын, мланде паша мыйым лыпландара. Теплицыштат шогылташ келша. Тушто киярым, помидорым, пурысым, салатым, базиликым шындем. Ешемым май-сентябрьыште свежа пакчасаска дене сийлем.
– Соцлаштыкыштет алмазный мозаике гыч ыштыме радынат-влакым ужынам. Моткочак мотор да ойыртемалтше улыт. Кидпашалан утларакшым могай тематикым ойырет?
– Пеледышым ончен кушташ йӧратем, садлан кидпашаштемат тиде тематике мылам лишыл. Тыгак эше номер почеш чиялташ келша. Тиде сомыл-влак чонем эмлат, неле паша кече деч вара кандарат, кочо шонымаш деч кораҥаш полшат.
– Паша нерген мутым луктынат гын, айда тугеже мут мундыранам тиде велыш савыралына.
– Мый ынде лу ий наре Шернур посёлкысо йочасадыште воспитательлан пашам ыштем. Шкешотан юбилейже августышто лиеш. Мустай школышто шым классым тунеммеке, Шернур посёлкысо икымше номеран школышто кадет классыште кок ий шинчымашым нӧлтенам. Вара Оршанке педколледжыш каенам. Тушто воспитательын специальностьшым налынам.
– Воспитательын пашаже кугу тӱткылым йодеш. Тылат ойырен налме сомылет келша?
– Мутат уке, кажне пашаште нелылык уло. Мылам йоча-шамыч дене пашам ышташ келша. Нуным ончен, шкежат ала-молан тунемат. Тыгак ньога-влакын сеҥымашыштым ужын куанет.
Йочасадыште занятийым эртарыме годым тӱрлӧ техникым кучылташ тыршем. Нунылан оҥай лийже манын, чылажымат модыш гоч ончыктем. Икшыве дене пашам ышташ йӧратымаш, чытымаш кӱлыт. А мыйын тиде чылажат уло манын шонем.
– Палем, тый сарзына-шамычлан маскировочный сетьым пидат. Тидым ышташ кумылет йодын, але?..
– Пелашем – ынде идалык утла сӧй эртыме кундемыште. Санденак пӧръеҥна-влаклан иктаж полышым пуаш манын, мыят шке надырем пышташ шоненам. Ӱшанем, мемнан пашана нуным кузе-гынат утара, мӧҥгӧ таза пӧртылаш йӧным ышта. Тыгак Шернур районысо «Отечествым аралыше воин-влакын ешышт» комитетым вуйлатыше Снежанна Богдановалан полыш кидым шуялтымем шуын.
Сетьым мый идалык наре пидам. Ом шылте, тӱҥалтыште неле лийын, но вара тунемалтын. Ончыч иктыжымак ышташ кок-кум кече каен гын, кызыт пел кечыште пидын шуктена. Тыгак кызыт блиндажысе сортам ыштена. Калык мыланна материал, окса денат полшп, тау нунылан.
Сомылнам ужде огыт код, аклат. Шернур район администраций, Марий Эл вуйлатыше Юрий Зайцев Таумут дене палемденыт.
– Маргарита, пеш кугу тау. Ыштыме сомылет вораныже, тыгаяк кумылзак, пашаче, поро кумылан лийын код.
– Тау.
Лидия ШАБДАРОВА мутланен
Фотом еш альбом гыч налме
