«Триумф» ПТФ» ООО
«Планна кугу – кушкаш шонена»
Тыгай предприятийже, озажын ойлымыж почеш, Российыште кокыт веле. Тушечын иктыже Звенигово район Кужмарий селаште верланен. Тушто пӱй коклам эрыктыме шырпым ямдылат. Тидын дене ӧрыктарынеда? – манын кертыт. А мо, тидат кӱлешан. Адакше ты предприятий ял кундемыште верланен. Тушто тӱшка озанлык шукертак петырнен. Да кеч тыгай паша верым почыныт. Предприятийыште кызыт 70 наре еҥ тырша. Шкешт Кужмарий села гыч веле огыл, пошкудо ялла гычат улыт. Теве – тӱҥжӧ.
Предприятийым 2008 ийыште предприниматель Евгений Николаевич Кальянов почын. Тудо ончыч «Ника» ПТФ» ООО маналтын, да тушто суши гай сийым кочкаш пашкарым ямдыленыт. А 2012 ий гыч пӱй коклам эрыктыме шырпым ыштымашке кусненыт да кызытат ты пашамак шуят. Ынде предприятий «Триумф» ПТФ» ООО маналтеш. Евгений Николаевич шукертсек Марий Эл Кугыжаныш Погынын депутатше сомылым шукта, мер пашажат сита. Санденак Никита эргыжын Казаньысе федерал университетыште экономистлан тунем лекмекыже, предприятийым вуйлаташ тудлан ӱшанен, а шкеже эскерен да ойым пуэн шога.
Никита Евгеньевич дене ме предприятий кудывечыште вашлийна. Тудын деке паша дене еҥ-влак толыныт ыле, сандене, цехыш пуртен, тыште кужу жап ыштыше мастер дене производствым ончал лекташ темлыш. А шкеже толшо-влак дене кайыш.
– Образованиемже дене бухгалтер улам, но тыште тӱҥалтыш гычак мастерлан ыштем. Кеч тиде пашалан тыште гына тунемынам. Тӱҥалтыште пашажымат кандашын гына ыштенна. Ынде шукын улына, лектышнажат палынак кушкын, – каласыш мастер Валентина Никитина да цехла мучко ончыктен наҥгайыш.
Куэ пӱчкышла гыч шырпе лийын шумеш пашаже кужун шуйна улмаш, да тидлан тӱрлӧ станок кучылталтеш. Ончыч куэ турлам лазырташ шындат, вара пӧрден лостыклат, тудым линейка лопкытын пӱчкедат, коҥгаш кошташ оптат. Йӱдвошт коштымеке, шырпе кӱжгытын кутышеш, а вара шырпе кужытын тореш пӱчкедат. Тылеч вара шырпылам пӱсемдат, пӧрден шымартат. Ямде лиймеке, вигак пластмасс атылашке оптен петырат але кажне шырпыжым, кагаз дене посна вӱдылын, кагаз коробкашке але плёнко вӱдылтышыш чумырен оптат.
– Производство тудо тугай: продукций ик станок деч весе деке колталтеш, да чыла почела ышталтеш. Ямде шырпыламат писын оптыман. Пашаеҥ-влак тидлан тунем шуыныт, южышт кечеш 3 тӱжем наре пластмасс атыш оптен шуктат. Мыняр ыштет, тунар налат. Мый нуным терген шогем, – рашемдыш Валентина Аркадьевна.
Тудо тыршен ыштыше-влакым палемденак ончыктыш. Татьяна Сочнева, Лариса Матвеева, Эльвира Краснова, Алевтина Воробьёва, Люся Михайлова, Марина Никитина тӱҥалтыш гычак тыште ыштат, мане.
Производствым ончал лекмеке, предприятий вуйлатыше денат мутым вашталтышна. Никита Евгеньевичын ойлымыж почеш, пашаеҥ-влаклан пашадар жапыштыже пуалтеш, вес ялла гыч коштшо-влаклан корно роскотлан тӱлалтеш, пашам чылан официально ыштат, соцпакет дене пайдаланат.
– Паша ышташышт йӧнан лийже манын, производство эреак уэмдалтеш. Шукерте огыл шырпылам пластмасс атылашке шке оптышо, атылам петыркалыше да иктеш вӱдылшӧ автоматический линийым налме. Лишыл жапыште кажне шырпым кагаз дене посна вӱдылшӧ да коробкашке иктеш оптышо у оборудований толшаш. Тидыже продукцийын качествыжым саемдаш, лектышым нӧлталаш полша. Сатунам тӱрлӧ вере вучат. «Лента», «Победа» да моло кугу опт компаний дене пашам ыштена. Ресторан, кафе да моло кочмывер сетьла дене кылым кучена. «Аэрофлот» ден Россий кӱртньыгорно компаний-влакын йодмышт почеш колтена. Да Россий мучко веле огыл, СНГ эллашкат – Беларусьыш, Казахстаныш. Турцийыш лекташ темлат. Паша планна кугу – кушкаш шонена, – каласыш «Триумф» ПТФ» ООО-н генеральный директоржо Н.Е.Кальянов. Да ме тудлан тидымак тыланышна.
Юрий ИСАКОВ
Снимкылаште: пашазе-влак Н.Дмитриев, Л.Михайлова, А.Матвеева ден О.Тимофеева, Е.Суворова ден мастер В.Никитина да Т.Сочнева.
Авторын фотожо
