Энергетике
Писын вашештыме да сорлыклымо
Кызытсе тыглай огыл жапыште илышлан кӱлешан объектлам террор лӱдыкшӧ деч аралыме йодышлан кугу тӱткыш ойыралтеш. Тыгай шонымаш денак «Рӱдӧ да Юл кундем Россеть» ПАО-н «Мариэнерго» филиалжын лӱдыкшыдымылык службыжын специалистше-влак 110 киловольт куатан подстанцийын дежурный пашаеҥже-влак дене пырля тунеммашым эртареныт.
Шонен лукмо почеш, подстанций кумдыкыш палыдыме кок еҥ пураш тӧчен. Нуным Лӱдыкшыдымылык управлений рӱдерын дежурныйжо кече мучко видеоэскерымаш системе гоч ужын шуктен. «Мариэнергон» лӱдыкшыдымылык службыжо ты верыш оролышо частный организацийын писын вашештыше группыжым ӱжыктен. «Осалым шонен пыштыше-влакым» спецслужбо сорлыклен.
Тренировко жапыште электроэнергетике объектыш пураш тӧчымӧ лӱдыкшӧ годым кӱлешан службылам ушымо радамым тергыме. Тунеммаш деч вара иктешлымашым ыштыме: пашаеҥ-влак шкеныштым кузе кученыт, видеоэскерымашын да аралалтме моло средствын пайдалыкышт кузерак палдарнен. Мом палемдыме, чыла шуктымо. Потребитель-влак да компанийын
оборудованийже эҥгекыш логалын огытыл.
«Мариэнерго» филиал лӱдыкшыдымылык йодышым кӱлын онча да лийын кертше вучыдымо ситуацийлан ямдылалтме шот дене чӱчкыдын тунеммашым эртара. Тидыже илышлан кӱлшӧ орбъектлам ӧрдыж гыч толын кертше лӱдыкшо деч аралымашке виктаралтын», – палемден филиал директор Сергей Хлусов.
Юрий Исаков ямдылен.
Снимкыште: энергообъектлам аралымашке оролышо частный организацийымат ушымо.
Фотом «Мариэнергон» пресс-службыж деч налме.
