Пиал – мо тудо тугай? Пиалан лияш манын, мом ыштыман? Шкендам пиалан айдемылан шотледа?
Надежда ЛУКИЯНОВА, И.С.Палантай лӱмеш тӱвыра да сымыктыш колледжын преподавательже:
– Пиал – тиде вучыдымо куан, родо-шочшо-шамычын шӱм-чон тазалыкышт, пашаште ма тунеммаште сай лектыш, куштылгылык.
Пиалан лияш эн ончыч тудым сулен налаш кӱлеш: шке поро койыш-шоктыш дене, пашаште тыршыме дене. Йочам, пӱртӱсым, юмым йӧратыман – тунам пиал пӧрдын толеш.
Мый шкемым пиаланлан шотлем. Юмо мылам ава лияш пиалым пуэн. Тунеммаште, сымыктышыште йочам-влакын поро лектышышт куандара.
Григорий АРХИПОВ, Э.Сапаев лӱмеш опер да балет академический театрын тӱҥ дирижёржо, композитор:
– Мо тугай пиал? Тиде йодышлан чапланыше Россий артист Евгений Леоновын каласымыж семын вашештем: эрдене куанен пашаш кайыме да кастене тыгаяк кумылан мӧҥгӧ пӧртылмым пиаллан шотлем.
Пиал – тиде таза да пиалан илыш, еш да родо, йӧратыме паша, весела кумылан шуко йолташ.
Ирина КУБЕКОВА, М.Шкетан лӱмеш Марий национальный драме театрын артистше:
– Пиалан улат тунам, кунам тыйын чонет волгыдо, эре мурымо шуэш, кунам нимогай кӧранымаш уке. Кунам лишыл еҥын, ешын, родо-тукым, йолташет, палымет-влакын да уло калыкын чыла сай.
Мый пиалан улам! Тӱняште тыныс илыш лиеш гын, эшеат чот пиалан лиям ыле!
Наталья БОГДАНОВА, мурызо:
– Пиал – тиде ош тӱняш толмаш, ош тӱняште чын илен моштымаш.
Шкемым пиалан айдемылан шотлем: уло воктенем шергакан аваем, шочшем-влак, ешем. Ӱстембалне кинде-шинчал, чоным куандарыше мотор пӱртӱс да муро алан. Пиалан лияш куштылгыжак огыл шонем, вет тидлан илышын тӱрлӧ йыжыҥжым чытен лекман да вара арален моштыман.
Ольга ФЕДОТОВА, Марий самырык театрын артистше:
– Пиал – илышын куанже.
Илышым эше ик гана илен лекташ лиеш гын, мый кузе илем ыле? Тыгак, вет мый кызытат пиалан улам: пеленем – йӧратыме Серёжа пелашем, кум чечен ӱдырем… Йӧратыме пашашкем куанен вашкем, тыгаяк кумылан мӧҥгӧ пӧртылам. Кажне кечылан йывыртен илем! Пиал – воктен улшо йӧратыме да шерге еҥ, еш.
Мӧҥгыштӧ ваш умылымаш, икте-весым пагалымаш да йӧратымаш айдемым пиаланым ыштат!
Марина ЖОЛОБОВА, фитнес- тренер (Морко район Шлань ял):
– Пиал – тиде шочмо сурт, ача-ава, шӱжарем-влак да лишыл пелашем. Илышыште шке верым мумым да таза капкылан улмым пиаллан шотлаш лиеш.
Кажне арнян каныш кечылан шочмо ялышкем кудалыштам, ешыште тӱрлӧ сомыл дене полшем. Пырля лийме годым шкемым эн пиаланлан шотлем. Ӱстел йыр чумырген, авайын тамле кочкышыжым тамлена да мутланен шинчена.
Йӧратыме паша айдемым пиаланым ышта, маныт. Тренер семын сай наставник лияш манын, кажне кечын уым пален налаш тыршем. Шкемым тӱрлӧ верыште тергем. Мылам йоча-влак дене пашам ышташ келша, сандене эреак оҥайым шонен луктам. Шӱжарем-шамычлан шочмо кечыштлан оҥай конкурс-влакым эртарем. У ий пайремлан пелашем дене Унчо кундемысе йоча-шамычым саламленна. Юбилейыштат вӱдышӧ семын шкемым терген ончышым, оҥай паша.
Пиалан лияш шке деч тӱҥалман: кажне кечын мом-гынат уым кычалман, вияҥман, чонлан келшыше сомылым шуктаман. Вет шканет пиалан лияш мо кӱлмым шкеак веле палет.
Алевтина БАЙКОВА ямдылен
Фотом еш альбом гыч налме
