…Эн ончычак тудо мыйым пачержын уна пӧлемышкыже огыл, а весышкыже пуртыш, а туштыжо кушко от ончал – чыла вере книга-влак, тӱҥ шотышто историй, тӱвыра, искусство дене кылдалтше. «Ик машинам книгагудылан пуэнам», – каласыш оза. «Эн йӧратымыже могай?» йодмемлан «Кызыт Антон Чеховым лудам, тудын психологийже келша. Николай Гогольым йӧраташ тӱҥалынам, поснак «Ревизоржо» кумылым нӧлталеш…» вашештыш. Курыкмарий кундем Шактемваж ялын эргыже, Марий АССР наукын сулло пашаеҥже, историй науко доктор, мер пашаеҥ, туныктышо Геннадий АЙПЛАТОВ 16 апрельыште 85 ийым темен. Тудын дене вашмутланымашым темлена.
