Марий калыкын XII погынжо почылтмо вашеш таче эр эрденак ме, «Марий Эл», «Кугарня», «Ямде лий» газет-влакын вуйлатышышт ден пашаеҥышт, тыгак Пошкырт кундем гыч толшо уна-влак, кумдан палыме марий просветитель, мер пашаеҥ, туныктышо, миссионер Павел Петрович Глезденёвым шарналташ Йошкар-Олаште тудын лӱмеш почмо скверыш мийышна да пеледышым пыштышна.
Тиде суап сомылым шукташ мемнан, «Марий Эл» газетыште тыршыше-влакын, амална поснак кугу, вет лачшымак тудо 1915 ийыште «Война увер» икымше марий газетым лукташ тӱҥалын. Чыланат палат, жап эртыме семын тиде савыктыш тӱрлӧ семын маналтын. Кызыт тудо йӧратыме «Марий Эл» газетна.
Саклымверыште погынышо-влак ончылно «Марий Эл» увер агентстве директорын икымше алмаштышыже, Марий Эл Республикысе Журналист ушем вуйлатыше Александр Абдулов ойлыш:
– Марий калыкын кугу тӱшка мероприятийже вашеш таче ме лӱмлӧ марий айдемым, Павел Петрович Глезденёвым, шарналташ да пеледышым пышташ тудын лӱмеш негызлыме скверышке толынна. Тиде саклымверым Марий Эл Республиклан 100 ий темме лӱмеш почмо. Ты мотор верым шочыктымаште «Марий Эл» газет редакцийын надырже кугу. Молан манаш гын тудын пашаеҥже-влак Марий калыкын погынжылан ямдылалтме годым Павел Петрович Глезденёвын лӱмжым Йошкар-Олаште иктаж-могай вер дене кылдаш резолюцийыш темлымашым пуртеныт ыле. Тиде темлымаш шукталтын – рӱдоласе мэрий Марий калык погынын резолюцийжын пунчалжым шотыш налын да Индешымше микрорайонышто верым ойырен. Тылеч вара тиде кумдыкым тӱзатыме, да кызыт тудо моткоч мотор верыш савырнен.
Павел Петрович Глезденёв тыгак кумдан палыме да пагалыме священник лийын. Вятке губернийысе марий-влак тудым Пагул ача маныныт. Марий калык коклаште пеш кугу миссионер лийын, просветительский пашам шуктен, школ-влакым почын. Да юмыжак тыге ыштен, витне: тудын лӱмеш сквер Йошкар-Оласе 9-ше микрорайонышто икмыняр ий ончыч гына почмо мотор черке воктене верланен. Порын шарналтен, таче ты верыште ме тудлан пеледышым пыштена.
Порысым шуктен каяш тарванымына годым черкыште лач гына чаҥым кыраш тӱҥальыч. Ме ты вер деч мыняр торлышна, тунар тиде йӱк чотрак йоҥгалте. Пуйто шарналташ толмыланна Павел Петрович йывыртен да тыге тауштен, мемнам ужатыш.
Саклымвер гыч Печать пӧртыш толна. Тыштат фойеште тудлан 2020 ийыштак, Марий калыкын XI погынжо почылтмо кечын, Шарнымаш оҥам вераҥдыме. Сандене, порын шарналтен, тушкат пеледышым пыштышна.
Павел Петрович Глезденёвын тӱҥал кодымо пашаже тек умбакыжат ила, да «Марий Эл» газетнан ӱмыржӧ эше кужу лиеш. Тек чыла марий газет ден савыктыш-влакым еҥ-шамыч ончыкыжымат куанен лудыт! Тек марий калык икоян лиеш!
Любовь Камалетдинова
М.Скобелевын фотожо
