Марий Элыште «Демографий» национальный проектым илышыш пуртымо кышкарыште ыштыме илалше еҥ ден инвалид-влакым кужу жап ончымо системе Российыште ик эн сай семын аклалтеш. 2024 ий 1 июньлан налмаште тудын социальный услугыжо-влак дене 2247 еҥ пайдалана.
Кужу жап ончымо системе – тиде илалше еҥ ден инвалид-влакым ончымо, ужатен коштыктымо, йол ӱмбак шогалташ да илышлан келыштараш полшымо паша. Шкат паледа, палемдыме граждан-шамыч мӧҥгыштышт илынешт. Тыгодым нуным ончаш, социально да медицине велым полшаш келшыше квалификаций да яра жап кӱлыт. Арам огыл тыгай ешлаште илыше-влак кокла гыч кеч иктыжлан паша гыч каяш логалеш. А кужу жап ончымо системым илышыш пуртымо дене нуно паша верыштым арален коден але тушко угыч пӧртылын кертыт.
Мутлан, Оршанке район гыч Муслим П.-лан вучыдымын черланымыжлан кӧра вакшышыш возашыже логалын. Тудым йӱдшӧ-кечыже манме гай ончаш кӱлынат, пелашыже паша гыч лектын. Кужу жап ончымо системе нерген Калыкым социально обслуживатлыме комплексный рӱдерын специалистше-влак деч пален налын. Нуно тудлан сиделкылан пашаш пураш да, келшыше шинчымашым налын, пелашыжым ончаш темленыт. Рӱдер тыгак Муслимлан реабилитацийым эрташыже кӱлешан чыла гаяк технический средствым ойырен.
Ушештарена, Марий Элыште кужу жап ончымо системын пилотный проектыштыже социальный услугым пуышо 17 кугыжаныш да 2 кугыжаныш огыл поставщик участвоватла.
Таче кечылан республикыштына илалше еҥ ден инвалид-влакым ончаш полшымо пашам 1588 еҥ шукта.
Палемдыме системе нерген тичмаш уверым илыме верысе Калыкым социально обслуживатлыме комплексный рӱдерыште рашемдаш лиеш.
М.ИВАНОВА
