Россий Главгосэкпертизе гыч увер толын: Йошкар-Оласе аэропортышто пассажир терминалын проектше да чоҥымо паша документацийым ончен лектыныт да сайлан шотленыт.
Йошкар-Олаште у терминалым шушаш ийын чоҥаш палемдыме. Аэровокзалын зданийже 5167,1 квадрат метр кумдыкым айла, перфорированный алюминий калай дене комыжлалтеш, ик шагатыште 400 пассажирым вашлияш-ужаташ йӧн лектеш. Икымше пачашыште пассажирым шупшыктымо сомылым шуктышо да авиаций лӱдыкшыдымылык службо-влак вераҥдалтыт, тыштак тазалык пункт, чоҥештен толшо да каяш ямдылалтше пассажир-влакын багажыштым тергыме вер, вучымо зал да моло пӧлем-влакат лийыт. Кокымшо пачаш вентиляций камерлан да хладоцентрлан келыштаралтеш, подвалыште – технический да бытовой, граждан оборонылан кӱлешан пӧлем-влак.
Проект почеш вокзал пеленысе площадьыште 117 машинам кӱчык жаплан да 21 машинам кужу жаплан шогалташ парковко вер ойыралтеш. Ты площадь дек кок-ныл полосан корно шуйналтшаш, 345 метран патрульный манме корно ышталтшаш. Тылеч посна 5080 кв.метр кумдыкан аванперрон, эрыктыше сооружений-влак, трансформатор подстанций да дизель электростанций лийыт, аэропорт йыр 231,66 метр кутышан авыртышым шупшыт, пожар годым кучылтшаш вӱдым темыман резервуар-влакым вераҥдат.
Кум ий гыч Йошкар-Оласе аэропорт идалыкыште 150 тӱжем утла пассажирым шупшыкташ тӱҥалшаш, а 2034 ийыште тиде показатель 223896 еҥыш шушаш.
Оксам федерал бюджет гыч ойыраш палемдыме. Проект документацийым «Ленаэропроект» юж транспортын проектно-изыскательный да научно-шымлыше институтшо ямдылен.
Л.СЕМЕНОВА ямдылен