Марий Эл вуйлатышын пашажым жаплан шуктышо Юрий Зайцев дене вашлиймаш годым Козьмодемьянскын мэрже Михаил Козлов олан историйже дене палдарен, предприятий-влак, федерал да регионысо программылашке ушнымо нерген каласкален да жапыштыже тӱлен шуктыдымо кредит парымым шӧраш 17,5 млн. теҥгем ойыраш йодын.
Тыгай парым сайжак огыл, тудо пашалан чаракым ышта, палемден Юрий Зайцев да республикын казнаж гыч окса полышым пуаш сӧрен. Эн пӱсӧ йодыш-влак кокла гыч Козьмодемьянскын мэрже «Водоканал» МУП-ын кредит парымжын кугытшым ойырен каласен. «Ресурсым пуышо организаций-влак дене ме ойпидышым пеҥгыдемденна, полшаш ямде улына, но парым шотышо обязательствым шукташ районынат, «Водоканал» МУП-ынат казнашт оксам огыт ситаре», – каласен Михаил Козлов. Тыгай йӧнысырыш элна мучко ятыр муниципал водоканал логалын, палемден Марий Эл вуйлатышын пашажым жаплан шуктышо да олан мэржылан педприятийым финанс нелылык гыч лукмо шотышто планым ышташ задачым шынден: «Реструктуризаций графикым ончалына. Энергетик-влак ончылысо жапыштыже тӱлен шуктыдымо парымым петырыман, суд пунчал-влакат улыт, очыни» да Водоканаллан республик бюджет кӱшеш финанс велым полшышо программым тӱҥалаш темлен. Чылаже 125 млн.теҥгем ойыраш палемдыме, тышеч 28,5 миллионжым – Козьмодемьянскысе «Водоканал» МУП-лан.
Корным тӧрлатыме йодыш лекмеке, Юрий Викторовичын мутшо гыч рашемын: корным тӧрлаш муниципал образований-влаклан 300 млн. теҥгем ойырымо шотышто республик правительствын пунчалжын проектше каҥашалтеш, тышеч 26 млн. теҥгем Козьмодемьянсклан ойыраш палемдыме. «Ончалза, мом эн ончыч олмыкташ кӱлеш, вара семын моло проблемыжым кораҥдаш тӱҥалына. А кызытеш мый ӱшандарен каласен кертам, палемдыме окса тендан казнаш пурышаш», – каласен Юрий Зайцев.
Л.СЕМЕНОВА
Д.Речкинын фотожо
