Марий Эл вуйлатыше Юрий Зайцев Федеральный казначействын Марий Элысе управленийжым ыштымылан 30 ий темме лӱмеш эртаралтше коллегийжын заседанийыштыже лийын.
Марий Эл правительстве ден казначействе управлений икте-весылан эҥертен, 2000 ийыште пашам ворандараш тӱҥалыныт.
Управлений национальный ден инфраструктур проектла шукталтмым эскера. Куд ий жапыште республикыште национальный проектлам илышыш шыҥдараш федеральный бюджет гыч 40,7 миллиард теҥгем кучылтмо.
Кызыт Федеральный казначействын Марий Элысе управленийже республикысе 1110 кугыжаныш ден муниципальный учрежденийлам обслуживатла. 2021 ий гыч, казначейский тӱлымӧ системын ышташ тӱҥалмекыже, республикын бюджетше ешартыш 4 миллиард теҥгелан пойдаралтын.
«30 ий жапыште управлений ик куатле механизм лийын. Тыланда опытда, профессионал улмыда веле огыл, тыгак у увер технологий, администрированийын кызытсе жаплан келшыше йӧнжӧ-влак полшат. Тендан ушнымыланда кӧра регионын экономике могырым вияҥме йодыш решатлалтеш, социальный сферысе объект-влак чоҥалтыт, йырвел тӱзаталтеш», – манын Юрий Зайцев.
Марий Эл вуйлатышын пресс-службыжын уверже негызеш Евгений Садовин ямдылен.
Денис Речкинын фотожо/Марий Эл вуйлатышын пресс-службыжо
