УВЕР ЙОГЫН

Пашажым эшеат вияҥдаш шона

 

Социальный ойпидышым ыштыме дене тÿнен илыше еш-влак сай полышым налын кертыт. Тудо неле илыш йогын гыч лукмыж деч посна эше шонымашыш шуаш корным почеш.

Тений февральыште республикыштына чылаже 203 тыгай ойпидышым ыштыме, ты чот гыч 122 – пашам кычалме шотышто, 125 – амалкалчын пашажым тÿҥалаш, 75 – шке подсобный озанлыкым почаш да 155 – молылан.

Мутлан, 40 ияш Наталья (фамилийжым ончыкташ каласен огыл) ийготыш шудымо кок йочам онча, массажистлан ышта, но пашадарже ешым кучаш огеш сите. Доходшым социальный контракт полшымо дене кеч изишак кугемдаш манын, Медведево районысо калыклан социальный полыш мере-влакым пуымо рÿдерыш миен. Туштыжо специалист-шамыч ÿдырамашлан неле илыш гыч лекташ да пашадарым кугемдаш лийме икмыняр йöным темленыт. Наталья социальный полышлан йодмашым возен да ойпидышын ик корныжым – эстетический косметический услугым пуышо амалкалчын пашажым – ойырен налын.    

Ӱдырамаш бизнес-планым ямдылен, тыгак соцконтрактын кышкарыштыже «Амалкалче пашан негызше-влак» программе дене шинчымашым налын.  

Ойырымо окса дене парогенераторан кедр фитовочкым, массажым ыштыме ÿстембалым, массажым ыштыше креслым да ончыкыжым кучылташ кÿлеш лийше материалым налын. Кызыт клиентше-шамычлан кедр фитовочкышто каналташ да эмлалташ темла, тыгак шÿргыш, могырыш массажым ышта, аппаратный косметологий дене пайдаланен, капкыл гыч пуным кораҥда.   

Амалкалче шке пашажым ончыкыжымат вияҥдаш, у шинчымашым налаш да услуго-влак радамым кумдаҥдаш шона.

                                                                                           М.ИВАНОВА

Опубликовать в Одноклассники

Добавить комментарий