СПОРТ

Паша шолеш – кумыл нӧлталтеш

 

У Торъял районышто илыше-шамыч вучен шуктеныт: райрӱдыштӧ лу ий утла ончычак чоҥашаш тӱҥалме Физкультурно-тазаҥдарыме комплексым умбакыже нӧлтат!

ФОК поселкыш пурымаштак верланен, сандене тушко толын кайыше да тыште илыше-влак, очыни, кажне шоненыт: «Ну, кунам тудым умбакыже чоҥаш тӱҥалыт?» Вет ты комплекс тынар ий пеле нӧлтымӧ шоген да чаманымаш кумылым луктын.

Пиалеш, апрель гыч тыште паша шолаш тӱҥалын.

 

Ты жап толын шуын!

Чынжымак, шолешак. Май кыдалне ик кечын У Торъял районыш командировкыш миенна ылят, шке пашана дене воктенысе ялыш кудалмына годым ФОК воктене, тудын кумдыкыштыжо машина-влак шогымым, еҥ-шамычын тыҥге-туҥге коштмыштым ужна. Тудо лишыл жапыште умбакыже чоҥалташ тӱҥалшаш нерген паленна да тидын нерген газетышкына уверымат возенам ыле. Но лачшымак кунам тиде лиеш – раш палыме огыл. Сандене паша кайымым ужын, «юмылан тау, ты жап толын шуын!» манын шоналштышна.

Да, мутат уке, фотографна ден коктын ты кумдыкыш пурен лектын, ФОК мучко гаяк коштын савырнышна. Уке, изиш шойыштам. Кокымшо пачашыш кӱзаш ӧрмалгышым. Тиде амал денак тошкалтышымат кычалаш ыжым тӱҥал. Лач икымше пачаш гыч кӱшнӧ мо ышталтмым вуемым йыр пӧрдыктыл ончыштым. Могай пашаеҥ тушто лийын гын, кажныжын гаяк кидыштыже могай-гынат инструмент ыле. Ончыштам, а шкеже шонкалем: «Теве пырдыжлаште кугу буква дене тӱрлым, «Здесь был Вася» манме сынаным,  возгалыме, тӱрлым сӱретлыме. А вет вашке чыла тиде йомеш, ӱштылалтеш, вес чия йымалан кодеш да чапле комплекс волгалт шинчаш, шкеж деке ӱжаш тӱҥалеш! Да чыла тидым шарналташ веле кодеш. Тидын марте улыжат икмыняр тылзе веле кодын…»

        

         Шкенан-влак шукынрак улыт

Ты коплексым чоҥымо пашам шукташ тендерым Москва гыч «Техстрой» организаций сеҥен налын. Сандене ФОК кумдыкышто тудын исполняющий директоржым йодышт-йодышт кычал муын, тудын денак мутланышна. Анатолий Абрамовын ойлымыж почеш, тыште Москва деч посна тыгак Курск, Йошкар-Ола, Киров, Казань гыч организаций-влак пашам ыштат. Тыгак мийымына кечын эше Москва гычак окнам шындыше организаций гыч пашаеҥ-шамыч толшаш улыт манын каласыш. Кеч ты жаплан чоҥымаште тугакшат 65 еҥ тыршен. Мо куандарыш: ончыкшым тыште 40 наре еҥ шкенан республик гыч лийшаш манын каласыш. Чынакыс, тек мемнан-шамыч, ешым жаплан коден, торашке пашам кычал кайыме олмеш, республикыштынак ыштат! Теве мийымына кечын У Торъял поселко ден воктенысе ялла гычат еҥ-шамыч, чылаже 12 еҥ, улыт манын ойлыш да кумылым эшеат нӧлтале.

 – Кызытеш Москва гыч 15 наре еҥ веле тырша. 20-25 еҥ – Советский поселкысо ПМК гыч. Бетоным шарымаште, сантехникым, вентиляцийым  вераҥдымаште, бассейныште чаше-влакын отделкыштым ыштымаште Йошкар-Ола гыч пашаеҥ-шамыч улыт. Кӱварым Казань гыч толшо-шамыч шараш тӱҥалыт. А арня утларак гыч тыште 80-90 еҥ лийшаш, – палдарыш Анатолий Николаевич.

 

Экскурсий

Тунам ФОК-ын икымше пачашыштыже тӱҥ кӱртньӧ конструкций-влакым йӱлыдымӧ чия дене чиялтат, а кокымшо ден кумшо пачашлаште шпаклеватлат, пӧрткоклаште электрик-шамыч пашам ыштат манын палдарыш. Тыгак кок метрат пеле келгытан бассейныште бетоным заливатлаш ямдылалтыныт, подвалыште штукатуритленыт. Сантехник-шамычлан лачак материалым конденыт ылят, нунат пашам ышташ тӱҥалмым вученыт.

Тидын нерген каласкалымекше, Анатолий Николаевич ончыктен коштыктыш да кушто могай паша кайыме дене умбакыже палдарыш:

– Тиде – бассейн-влак верланыме отделений. Тыште кок чаше лиеш. Иктыже – стандартный, весыже – йоча-шамычлан келыштарыме. Кызыт тыште армироватлыме паша кая. Вара канализацийым ышташ тӱҥалыт.

 

Изин-кугун вучат докан

Мемнан миен толмына деч вара жап шагал огыл эртен. Тугеже ты пагытыште тушто паша ятыр ышталтын…

А такшым ФОК-ым ноябрь марте ыштен шуктышаш да пашашке колтышаш улыт.

– Чылажат график дене келшышын ышталтеш. Но такше ме изишак ондакракат шуктен толына, – мутланымаш мучаште палемдыш ты кумдыкышто чоҥымо пашам вуйлатыше А.Абрамов.

У Торъял районышто илыше-влак ноябрьым изин-кугун вучат, очыни. Вет тунам нунын тазалыкым пеҥгыдемдаш йӧнышт эшеат шукырак лиеш.

Любовь Камалетдинова

М.Скобелевын фотожо

Опубликовать в Одноклассники

Добавить комментарий