Законодательный органын правовой службыжо-влакым вуйлатыше-шамыч законым лукмо паша дене кылдалтше пӱсӧ йодышлам лончыленыт.
19 майыште Йошкар-Олаште Юл кундем федеральный округысо субъект-влакын законодательный органыштын правовой службо аппаратлаштым вуйлатыше-влакын паша совещанийышт икымше гана эртен. Тушто 11 регионысо парламентын еҥже-влак участвоватленыт.
Марий Эл Кугыжаныш Погынын аппаратшым вуйлатышын алмаштышыже, правовой виктемын начальникше Елена Попова коллегыже-влаклан мемнан республикысе парламентыште верысе закон-влакым федеральный дене келыштарыме пашам системе почеш шуктымо нерген каласкален.
Башкортостан Республикын Кугыжаныш Погыныштыжо – Курултайыште – федеральный законодательный тӱҥалтышын паша ойыртемже дене парламентын секретариатшым вуйлатышын алмаштышыже Арсен Еникеев палдарен.
Парламент ден исполнительный кучем орган-влакын законым ямдылыме аланыште пашам пырля шуктымышт нерген докладым Татарстан Республик Кугыжаныш Погынын правовой виктем аппаратшын начальникше Марат Сунгатуллин ыштен.
Доклад-влакым каҥашыме годым совещанийын участникше-шамыч шке опытышт дене палдареныт, регионыштышт законым ямдылыме пашам организоватлыме ойыртем нерген каласкаленыт.
Совещанийыште пашам вашла ыштыме тыгай форматым умбакыжат шуяш пунчалме.
М.ИВАНОВА
Фотом Марий Элын Кугыжаныш Погынжо деч налме
