Тудым «Лӱдыкшыдымӧ да сай корно» национальный проект, Марий Эл вуйлатыше Юрий Зайцевын лукмо пунчалже дене келшышын да кундемысе Минтрансын полшымыжлан кӧра шотыш кондат.
Шумелёв уремысе корнын Строитель ден Бауман уремла кокласе ужашыжым тений июльышто ышташ тӱҥалыныт. Чылаже 0,515 километр наре кужытым олмыктышаш улыт. Йошкар-Оласе Общественный контрольын еҥже-влак тиде объектышке икымше гана огыл лектыт, молан манаш гын пашам ноябрь марте мучашлышаш улыт.
– Таче кечылан ик эн кугу пашажым ыштеныт: вондер-влакым кукленыт, железобетонный плита ден йолешке-влаклан кӱртньӧ гыч ыштыме авыртыш-шамычым кораҥденыт, – каласыш Общественный контрольын еҥже Вячеслав Пастухов.
Корным тергыше-влак подрядный организацийын еҥже-шамыч дене пырля подрядчик-влак дене мутланеныт, ыштыме пашам акленыт, улшо экшыкым актыште пеҥгыдемденыт да тудым подрядичиклан кучыктеныт.
Каласыман, чыла паша технологийым, нормым, йодмым шотыш налын, шукталтеш. Корно шартышлан гарантий вич ий лиеш.
