Покро да Угинде пайремла вашеш Звенигово рӱдӧ книгагудышто «Подкогыльым ыштена – мастарлыкнам ончыктена» мероприятий эртыш. Тудо марий йылмым палыше да марий кочкышым пагалыше-влакым иквереш чумырыш.
Пайрем ӱстелым эн чотшо когыльын сӧрастарымыже чылалан раш. Тамле да чатка подкогыльо мастарлыкым ончыкта гын, тудым тӱшкан ыштыме йӧн икте-весым пагален, родо-тукым семын келшен илаш тарата.
Кугырак-влак пайрем вашеш калык пале-шамычым ушештарышт, кочкышым ямдылыме годым ойӧрӧ дене палдарышт. Тоштыеҥ арам туныктен огыл: «Вараш кодаш огыл манын, чылажымат самырык годымак палаш тыршыман».
Ойлат, марий калык тиде пайремым эше Мланде кылмыме кече манын, садлан вольыкшымат кӱтӱш колтен огыл. Шемгоракат, йӱкшемдымым шижын, Покро деч лачшымак ик кече ончыч чоҥештен кая. Мом ыштет, ончылно йӱштӧ теле вуча. Но мемнам тудо нимынярат ок лӱдыктӧ! Йӱштӧ Кугыза дене вашлияш ямде улына: Покро рожлам петыркаленна, олмапу укшламат коҥгашке пыштенна – кугезына-шамыч, телым суртышто шокшо лийже манын, ты кечын коҥгам олмапу комыля дене олтеныт. Нуно Покро арнян пеш шекланеныт, манмыла, «айда йӧра» илен огытыл. Пайрем кечын ковышта когыльым йӧратен кочкыныт гын, тиде пакчасаскам телылан шинчалташ нигӧ тоштын огыл. Пӧрткӧргымат ончылгоч эрыктеныт. Эн тӱҥжӧ, мончаште ӱмбал лавырам мушкын, неле-йӧсым шӱалтен, пайрем вашеш у шӱлышым налыныт.
Мемнан коклаште палемдыме йӱлам шукташ кӱлмӧ шотышто «Тиде ерунда!» маншат лектын кертеш. Мыйын шонымаште, чыла «йӧра» ден «ойӧрӧ» пайремым ару чон да капкыл, волгыдо шонымаш дене вашлияш ӱжеш. Поро шонымашан да чонан еҥын йолташыжат шуко, пошкудыжат родо гай лишыл!
Н.БОЯКОВА,
Звенигово рӱдӧ книгагудын краеведений секторжын вуйлатышыже
Авторын фотожо
