30 июньышто Параньга районысо Лаж ялыште Сабантуй ден Пеледыш пайрем эртен.
Тушко Марий Эл вуйлатыше Юрий Зайцев, Марий Эл гыч сенатор Сергей Мартынов, Правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов да Татарстан Республикын представительже Габдулхат Хакимов миеныт.
Уна-влакым республик вуйлатыше Юрий Зайцев саламлен. Тудо палемден, Сабантуй ден Пеледыш пайрем тӱрлӧ калык илыман Марий Элыште курымла дене йӱлам арален да шуен толмо символлан шотлалтеш.
–Тиде кок пайремжымат ик амал дене эртараш тӱҥалыныт, вет ӱдымӧ пашам пытарымеке, еҥ-влак каненыт, пайремленыт, еш дене погыненыт, сай игечылан куаненыт. Республикыштына марий, руш, чуваш да татар-влак келшен илат, садлан кок пайремжымат пырля палемдена. Тидыже мемнан республиклан веле огыл, тӱрлӧ калык илыман эллан моткоч кӱлешан. Ме тӱрлӧ йылме дене мутланена гынат, икте-весынам сайын умылена, вет чылан ме ик мландыште илена! – каласен Юрий Зайцев.
Регион вуйлатыше палемден: Сабантуй ден Пеледыш пайрем каныш кечым да нойымым ончыде мланде пашам шуктышо, пасушто тыршыше-влаклан пеш кӱлешан.
– Тендан тыршымыда дене республикна кочкыш сатум ситара, Марий кундемнам пойдарен да сылнештарен, ялозанлыкна вияҥеш, – палемден Юрий Зайцев.
Пайремыш мийыше-влаклан концерт да тӱрлӧ таҥасымаш: армрестлинг, канатым шупшмаш, корэш – лийыт.
Варажым регион вуйлатыше икмыняр еҥым награде дене палемден. «Победа» ялозанлык производственный кооперативын кочмывержым вуйлатыше Людмила Семёнова ден «Нур» Агрофирме ООО-н директоржо Рифат Сулеймановлан Марий Эл правительствын чап грамотшым, а «СафЭко» ООО-н тракторист-машинистше Фаиль Салимьяновлан Марий Эл вуйлатышын таумутшым кучыктен.
Марий Эл вуйлатышын пресс-службыжын уверже негызеш А.Байкова ямдылен
Д.Речкинын фотожо
