Марий Элысе коммерческий огыл организаций-влак президент грантым налыныт.
Президент грант фонд 2019 ийыште граждан обществым вияҥдышашлан Россий Федераций Президент грантым пуымо икымше конкурсым иктешлен. Палемдыме грант 1644 проектлан логалын, латкокытшо – Марий Эл гыч пурышылан.
Сеҥыше-влак радамыш логалыныт:
- «Ключи к здоровью» автономный коммерческий огыл организаций, тазаҥдыме-сотемдарыме рӱдер («Тазалык элыш путешествий» тазаҥдыме-палдарыме программе»);
- Инвалид-йоча-влакын правашт ден закон дене пеҥгыдемдыме интересыштым аралыше «Особая семья» региональный мер организаций («А мемнан – Ресурс класс! Кокымшо этап»);
- Медиапроект ден социальный тӱҥалтышым вияҥдыше «Добрая Республика Марий Эл» региональный мер организаций («НКО-лан трамплин: Марий Элысе коммерческий огыл организаций-шамычын социальный услуго-влак рынкыште ончыкылыкышт»);
- Ментальный инвалидностян да 18 ий деч кугурак шочынак инвалидан (тӱҥ шотышто аутизм черан) еш-влаклан полшымо шотышто «Раскрась мир» региональный мер организаций («Аутистический спектрышт пужлыман йоча-влаклан «Тунеммем шуэш» ямдылалтме класс»);
- Кӱшыл шинчымашым пуышо «Регион-влак кокласе почмо социальный институт» автономный коммерческий огыл организаций («Марий Элыште региональный студент Боевой искусство рӱдер»);
- Инвалид йочан да 18 ий деч кугурак шочынак инвалидан еш-влаклан полшымо шотышто «Волжск олан ончыкылыкан йочаже» верысе мер организаций («Ваш выход!»);
- Ешартыш профессиональный шинчымашым пуышо «Сфера» автономный коммерческий огыл организаций («Аралыше-влак» куснылшо фотоончер»);
- «ИНТЕЛЛЕКТУАЛ» тӱвыра-увер рӱдер» автономный коммерческий огыл организаций («Кувавайын шондыкшо – Бабушкин сундук»);
- Марий Элын правовой полышым пуышо «Калык юрист» региональный мер организацийже («Калык юрист»);
- «Тӱвыра поянлыкым арален кодаш полшышо обществе» региональный мер организаций («Вӱдвакш» этнокультурный комплекс»);
- «Историй да культур памятник-влакым аралыме всероссийский обществе» марий региональный пӧлка («Кӱ джунгльышто – пу йомак»);
- «Паллада» парус клуб» региональный йоча мер организаций («Марий Элын йоча флотилийже»).
Президент грант фондын регионысо проект-влаклан финанс шотышто полшымо суммо 21 млн. утла теҥгеш шуын.
Ушештарена: 10 июньышто 2019 ийыште гражданский обществым вияҥдышашлан Россий Федераций Президент грантым пуымо кокымшо конкурс тӱҥалеш. Йодмашым 31 июль марте пуэн шукташ кӱлеш. Тыгак 2020 ийын икымше конкурсшылан йодмашым 14 октябрь гыч 25 ноябрь марте пуаш лиеш.
М.ИВАНОВА
