Марий Элысе медицине организаций-влак Оренбург областьыште вӱд ташлымылан кӧра азапыш логалше-шамычлан гуманитар полышым погымашке ушненыт.
– Российыште моткоч кугу азап лийын, – манеш регионын тазалык аралтыш министрже Марина ПАНЬКОВА (снимкыште). – Шошо вӱд шуко кумдыкышто ташлен, поснак Оренбург областьым авалтен. Тиде шучко сӱретым ӧрдыжыштӧ ончен шогаш огеш лий. Азапын эҥгекшым аклаш йӧн эше уке. Ме Оренбург областьысе тазалык аралтыш министр дене тӱҥ проблеме-влак нерген кутыренна, эн ончычак лачшымак мо кӱлмым рашемденна. Министрын ӱшандарымыж почеш, чыла медицине препарат ситышын уло, а теве дезинфицироватлыме средстве ок сите. Тиде йодышым республикна уже решатла.
Таче Тазалык аралтыш министерствын ведомствыштыжо улшо ик организацият ӧрдыжеш кодын огыл. Оренбург областьыште илыше калыклан гуманитар груз ден оксам латкок тӱжем утла пашаеҥ шке кумылын ойырен. Тазалык аралтыш министерстве Оренбурглан полшымо шот дене ик кечаш пашадарым колташ пунчалын. Тыгак личный гигиене средстве ден вургемым погена. Умылена, ик гана полшымо дене серлагаш огеш лий – регионлан йол ӱмбаке шогалаш шагал огыл жап кӱлеш. Тыште тудлан чумыр Россий, ты шотышто Марий Элат, полшышаш.
М.ИВАНОВА ямдылен
Марий Эл Тазалык аралтыш министерствын фотожо
