КУЛЬТУР ДА ИСКУССТВО СЫМЫКТЫШ ТЕАТР

Оперыште – тӱнямбалне чапланыше артист-влак

Композитор, СССР-ын калык артистше Андрей Эшпай лӱмеш опер искусство фестиваль тений Йошкар-Олаште 3-11 октябрьыште эрта.

Мероприятий деч ончыч тӱвыра, савыктыш да калык-влакын пашашт шотышто министрын пашажым шуктышо Константин Иванов Э.Сапаев лӱмеш опер да балет академический театрын коллективше дене Андрей Яковлевичын бюстшо воктеке пеледыш аршашым пыштеныт да марий искусствым вияҥдымаште надырже нерген шарналтеныт.

Фестиваль жапыште ончыкталтше спектакльлаште тӱнямбалне чапланыше солист-влак тӱҥ партийыште мураш тӱҥалыт. Мутлан, икымше кечын «Флория Тоска» спектакльын премьерыштыже пӧръеҥын тӱҥ партийжым Санкт-Петербург гыч Мариинский театрын солистше Российын сулло артистше Ахмед Агади мурен.

Кок арня жапыште Йошкар-Олаште илыше да тышке унала толшо-влак Большой театрын, тыгак «Геликон-опера», «Новая опера имени Е.Колобова», К.Станиславский ден В.Немирович-Данченко лӱмеш Москосо музыкальный театр-влакын чапланыше артистышт-влакын мастарлыкыштым «Кармен», «Травиата», «Аида» спектакльлаште ужын кертыт. Фестивальым Беларусь Республикын Большой театрже «Евгений Онегин» опер дене мучашла. Туштат тӱҥ партийым иза-шольо элыште чапланыше солист-влак мураш тӱҥалыт.

А.БАЙКОВА

Фотом театрын соцсетьысе

лаштыкше гыч налме

Опубликовать в Одноклассники

Добавить комментарий