Марий Элыште полицейский-влак мошенник-шамычын ондалаш тыршымыштым чарен шогалташ полшымыштлан банк-пашаеҥ-влакым наградитленыт.
Йошкар-Олаште илыше ик пӧръеҥлан палыдыме еҥ йыҥгыртен да банк пашаеҥ улмыж нерген каласен. Вара увертарен, пуйто ала-кӧмыт тудын лӱмжӧ дене кредитым налаш тӧчат. Тидым чараш манын, аферист пӧръеҥым 1 миллионат 700 тӱжем теҥге кредитым налаш да «лӱдыкшыдымӧ счетыш» кусараш кӱштен. Тудо тыгак ышташ тарванен. Но банкын менеджержым пӧръеҥын моткочак тургыжланыше улмыжо ӧрыктарен. Тунам тудо ты клиентлан мошенник-шамыч йыҥгыртен огытыл манын йодын. Банк пашаеҥ-влак рашемденыт: пӧръеҥ нунын «оптышышкышт» логалын. Тылеч вара тудын дене шижтарыме сынан мутланымашым эртареныт да 2 миллион наре теҥге оксажым ондалкалыше-влаклан колташ кутырен чарен кертыныт.
Марий Элын Элгӧргӧ паша министржын алмаштышыже – полиций начальник Алексей Коновалов нине банк пашаеҥ-влаклан полиций деч Тауштымашым кучыктен.
– Банк системыште весын ойгыж деч ӧрдыжкӧ кораҥаш тыршыдыме еҥ-влакын пашам ыштымышт моткочак кӱлешан. Тендан поступокда – чылаштлан пример. Тау тыланда, – каласен тудо.
Чынжымак, мыняр ме икте-весылан полшаш тӱҥалына, тунар илышыште уда койыш ден осал паша шагалрак лийыт.
Л.Камалетдинова
Фотом Марий Элысе МВД-н сайтше гыч налме