КРИМИНАЛ

Шинча пӱсылыкым «тергаш» лектын!

Шучко коронавирус шарлыме жапыште мошенник-шамыч тиде инфекций нунылан пижын кертеш манын огытат лӱд ала-мо – тӱрлым шонен муын, еҥ-шамычым пачер еда ондалкален коштыт.

Теве кодшо кечылаште кумдан палыме актрисе ондалалтмыж нерген телевизор дене шкежак ойлыш. Тудо коронавирус дене черланымыж-укеж шотышто тергалташ шонен да специалист-шамычым ӱжыктен. А мошенник-шамычше тидын нерген иктаж-кушеч ала пален налыныт, ала, манмыла, кӱлеш жапыште кӱлеш верыш миен лектыныт – аралалтме вургемым, маскым чиен, тудын деке толын лектыныт. Но, мутат уке, тидым ыштен огытыл. А актрисе деч паспортшым йодшын койыныт. Тудын документлан кайымыж жапыште прихожийыштыже кийыше 100 наре тӱжем теҥгеаш сото телефонжым ужыныт, тудым налыныт да писын гына лектын куржыныт…

Мошенник-шамыч палыме еҥ-влакымат ондалаш огыт ӧр гын, молышт нергенже мом ойлаш?! Нуно тидым кузе гына огыт ыште, мом гына огыт темле?! Я оксам «вашталтат», я счётчикым пуйто тергат, я Пенсий фонд пашаеҥ «лийыт».

А тиде арнян ик паша кечын мыйын илыме пӧрт пачерлашке тӱкален, йыҥгыртен, путырак оҥай йӧным темлен коштыч.

Мыйын омсашкем иктаж кечывал лишанрак йыҥгыртышт. Дистанционно, мӧҥгыштӧ пашам ыштенат, лачак статьямак возен шинчем ыле. Йыҥгыртымым колын, «кӧ тушто?» манын йодым. Тӱҥалтыште мом вашешташат ӧрӧ ала-мо, а вара шоктыш:

— Ме шинча пӱсылыкым тергена.

— Мо-о? – маньым да ӧрмем дене «глазокыш» ончальым. Ужам: иктаж 20 ияшрак какши рвезе шогылтеш. Пачер еда куржталын, ноен пытен ыле ала-мо: очыни, солидность манмылан кидышкыже кучымо папке гайым пеш лупша. Шокшештын. Умбакыже сайынрак ончальым гын, чурийжым ны маске дене петырен огыл, кидыштыжат перчатке уке. Воктекыже ала-могай сумкам пуртен шынден. Шинча пӱсылыкым тергаш лектын гын, медицине образованиян лийшашыс. А нуно такше халатым чият. Тиде гын тувыр да йолаш дене шогылтеш. Халат ушыштыжат лийын огыл дыр. Тӱҥжӧ — тергалташ келшыше иктаж окмакым муаш да писынрак оксажым ондален налаш. Мый, конешне, шым пурто.

— Да мом те ойледа-а? – манын, шылталыме семын пелештышым. Ондален кертдымыжым рвезе умылыш, витне – тетла нимом ыш пелеште.

Изиш лий, умбакыже мом ышташ тӱҥалеш манын, омсам почынак ончальым. Ужам: ӱлыл пачашыште ик ӱдырамаш омсажым кугу-ун гына почын шогалын да саде «тергышет» дене шыргыжал-воштылал гына мутлана! Йӧра, кольым: тергалташ ыш келше. Уке гын мутланымашке ушнашат кумылем лекте. Ала коронавирусан коштеш да инфекцийже пижеш манынат лӱдын огыл ыле ала-мо?

Ондалаш шонен коштшо-шамычше огыт умыло мо: таче нуно чояланаш тӧчат, а эрла тудын гаяк уда шонымашан вес еҥ шкенжым але аважым, вес лишыл еҥжым ондален кертеш. Тыгодым эше шучко коронавирус инфекцийым пижыктен кода гын? Тунам оксалан ужалалташ кумылышт пеш вашке йомеш дыр…

Л.КАМАЛЕТДИНОВА

Опубликовать в Одноклассники

Добавить комментарий