ОМОН-ыш пашаш пураш экзаменационный бойым эртымыж деч вара колышо Максим Ядыковын ача-аваж ден изаже моральный эҥгекым ыштымылан Россий элкӧргӧ паша министерстве деч компенсацийым налаш Йошкар-Оласе судыш пуэныт ыле. 17 ноябрьыште эртыше заседанийыште Йошкар-Оласе суд Россий МВД-лан Максим Ядыковын ешыжлан 2 миллион теҥге компенсацийым тӱлыкташ пунчалым луктын. Тиде дела шотышто шымлымаш ден тергымаш умбакыже шуйнат.
17 ноябрьыште Йошкар-Оласе судын Ядыковмыт ешлан компенсацийым тӱлымӧ нерген лукмо решенийжым Россий МВД обжаловатлен. Аппеляционный жалобым рвезын ача-аваже ӱмаште 5 декабрьыште налыныт.
Тушто ответчик-влак судын решенийжым кораҥдаш йодыныт. Аппеляцийыште палемдыме ик амалже – тиде Ядыковмыт ешын искше почеш ответчикын – Россий МВД-н – титакшым доказатлыме огыл. Тыгак министерствын представительже-влак палемденыт: экзаменын условийже могай улмо нерген Максим Ядыков шижтаралтын да тидым шке кидпалыж дене пеҥгыдемден. Тидак обжалованийым пуаш амалым ыштен.
Марий Элын Верховный судшо Йошкар-Оласе судын решенийжым кодшо кечылаште кораҥден. Оласе судын лукмо решенийжылан МВД-н вуйшиймашыжым 28 февральыште эртыше судын заседанийыштыже колыштыныт.
Индырымаш ваштареш комитетын юристше, Ядыковмыт ешын интересшым аралыше Дмитрий Яликовын палемдымыж почеш, Марий Эл Республикын Верховный судшын лукмо решенийже дене нуно огыт келше, сандене кассационный порядке дене обжаловатлаш пуаш шонат. Марий Эл Кугыжаныш Погынын депутатше Борис Герасимов прокуратурыш кассационный инстанцийыште делам угыч ончен лекташ да республикын Верховный судшын 28 февральыште лукмо решенийжым умылтараш йодмашан серышым колтен. Марий Элын прокуроржо Сергей Рюмшин Верховный судын шукерте огыл лукмо решенийже дене прокуратур огеш келше да обжаловатлаш шона манын палемден да тыге ойлен:
— Тиде гражданский делан материалжым республикын прокуратуржо кассационный порядке дене шымлен. Тестированийым эртарыме годым поединкын илышлан лӱдыкшыдымӧ лиймыж шотышто Марий Эл Республикын МВД-жын титакше лийдыме нерген аппеляционный инстанцийын судшо йоҥылыш иктешлымашым ыштен. Кызыт республикын Верховный судшын гражданский дела шотышто судебный коллегийжылан аппеляционный определенийлан кассационный представлений ямдылалтеш.
Верховный судын лукмо решенийжылан кассационный вуйшиймашым пуаш ямдылалтмым Индырымаш ваштареш комитетын юристше, Ядыковмыт ешын интересшым аралыше Дмитрий Яликоват пеҥдыдемден.
— Максимын илышыжым да тазалыкшым арален кодышашлан кӱлеш мерым, мемнан шонымаште, лачшымак МВД ыштен огыл да колымаштыже министерствак титакан, — палемден Д.Яликов.
Л.Камалетдинова.
