Марий Элын командыже – Юл кундем федеральный округысо Интеллектуальный олимпиадын окружной финалыштыже .
Тиде республикысе школла гыч уш-акыл таҥасымашын регионысо этапыштыже сеҥыше 13 тунемше. Нуно Йошкар-Оласе 11, 28-ше, 26-шо лицейла, тыгак Козьмодемьянскысе 3-шо №-ан школ гыч улыт.
Финал 12-14 мартыште Пермьыште эрта. Тушто Юл кундем федерал округын 14 регионжо гыч 182 ӱдыр-рвезе шинчымашым ончыкта.
Таҥасымаш деч ончыч Марий Элын командыж дене республикын образований да науко министрже Лариса Ревуцкая вашлийын, сеҥымашым тыланен. Тудо палемден: «Юл кундем федерал округын Интеллектуал олимпиадыже – моткочак кугу да кӱлешан мер проект. Российын моло округлаштыже тыгай уке. 2024 ийыште Марий Элын командыже тушто 2-шо верым сеҥен налын. Кызытсе задачына – лидер-влак радамыштак лияш да республикын чапшым кӱшнӧ кучаш».
Г.Кожевникова
Фотом Марий Эл Образований да науко министерствын соцкылысе лаштыкше гыч налме
