Российысе калык-влакын ассамблейыштын Марий Элысе пӧлкаштыже республикыштына Тӱрлӧ национальностян самырык-влакын II патриотический слётыштым эртарыме нерген каҥашымаш лийын.
Российысе калык-влакын икоян улмо идалыкыштлан пӧлеклалтше, тӱрлӧ национальностян самырык-влак коклаште келшымаш кылым вияҥдыше
мероприятий тений 19-21 августышто Йошкар-Олаште лиеш. Тудо Российысе Национальность-влакын пашашт шотышто федеральный агентствын полшымыж дене эртаралтеш.
Каҥашымаште Марий Эл Кугыжаныш Погынын председательжын икымше алмаштышыже, Российысе калык-влакын ассамблейыштын Марий Элысе пӧлкажын председательже Лариса Яковлева тӱрлӧ калыкым иквереш чумырышо слётын кӱлешлыкше нерген палемден каласен. Мероприятийын программыж дене погынышо-влакым Марий Эл Кугыжаныш Погынын депутатше, Йошкар-Оласе 32-шо №-ан школын директоржо, «Российысе марий-влакын федеральный калыкле-тӱвыра автономийышт» мер организацийым вуйлатыше Наталья Пушкина ямдылен да палдарен.
Слёт Йошкар-Оласе 32-шо школышто стартым налеш. Участник-влакым оҥай да пайдале программе вуча. Тудын кышкарыштыже Марий Элым вуйлатыше Юрий Зайцев дене «Иктӧр вашмутланымаш» вашлиймаш, Йошкар-Ола дене таҥошкылмаш эртаралтеш, усталык площадке-влак пашам ышташ тӱҥалыт.
Слётын участникше-влак Чарла Кремльыште усталыкым ончыктат. Этнокасым уна артист-влак Светланая Яндукова, Станислав Устюгов, Сергей Пакеев, «ШЫП ЛИЙ» группо да молат сӧрастарат.
Тӱрлӧ национальностян самырык-влакын I патриотический слёт Марий Элыште «Чодыра йомак» каныме да тазалыкым пеҥгыдемдыме йоча рӱдерыште 2023 ийыште лийын.
Снимкыште: Российысе калык-влакын ассамблейыштын Марий Элысе пӧлкаштыже каҥашымаш.
Фотом Российысе калык-влакын ассамблейыштын Марий Элысе пӧлкажын соцкылысе лаштыкше гыч налме
