Пытартыш ийлаште Марий Элын Пӱртӱс поянлык, экологий да йырым-йырысе средам аралыме министерствын кӱштымыж почеш, республикыште бюджет окса кӱшеш лицензийым налше карьерлаште мланде кӧргӧ поянлыкым кӱнчен лукмо пашам тергыме амал дене космос гыч мониторинг эртаралтеш.
Тидыже закон дене келшыдымын мланде йымалсе поянлыкым лукмо верламат рашемдаш полша. Мониторингым Канопус-В и Ресурс-П космический аппарат-влак полшымо дене эртарат. Тудым «Российысе космический системе-влак» АО республиклан яра ойырен.
Тергыме пагытыште тӱрысшӧ карьерлан келшен толшо 600 объектым рашемдыме. Верлаш лектын эртарыме тергымашат тидым пеҥгыдемден. Мутлан, тений гына мланде йымалсе поянлыкым лукмо 100 объектым рашемдыме. Тышеч 34- ше легальный гын, 66-шо — закон дене келшыдымын кучылталтеш. А верлаш лектын тергымышт 21 карьержын легальный огыл улмыжым тӱжваке луктын.
С.Носова.
