Йӱштӧ пагыт лишемме семын руспубликыштына шукырак да шукырак еҥ кылмен черлана. Тыгай шотан ситыдымаш деч кузе аралалташ? Тиде йодышлан Марий Элын тазалык аралтыш министржын алмаштышыже Юлиана Зейтулаева вашешта:
– Шыжым, телым да шошым калыкыште респираторный инфекций дене черланыме чот палынак кугемеш. Тыгай шотан ситыдымаш деч аралалташ манын, тиде пагытлан ончылгоч ямдылалтман. Эн шучко инфекцийлан грипп шотлалтеш. Тудо тазалыкым лунчыртымыж деч посна айдемым илыш гычат наҥгаен кертеш. Республикышкына грипп деч вакциным ситышын кондымо, сандене шкем чер деч аралаш йӧн уло.
2022 ийыште Марий Элыште илыше чумыр калык гыч 60 процент ужашым, 400 тӱжем наре кугыеҥ ден йочам, вакцинироватлаш палемдыме. Регионышкына Совигрипп ден Ультрикс Квадри вакцине-влакым кондымо. Кокымшыжо хронический черан пациент, мӱшкыран ӱдырамаш да 12 ияш марте йоча-влаклан палемдалтын. Тудо А вирусын штаммже (Н1N1и H3N2 – «сӧсна» да «кайык» грипп), В вирусын кок штаммже ваштареш шоген кертше компонентан. Совигриппыште «сӧсна» да «кайык» грипп, В вирусын ик штаммже деч аралыше компонент уло.
Грипп деч прививкым республикыште илыше кажне еҥ илыме верысе медицине организацийыште чылт яра ыштыктен кертеш.
М.ИВАНОВА
