С.Г.Чавайн лӱмеш национальный книгагудышто «Тыште Онарын мландыже тӱҥалеш» лудшо-влакын конференцийышт эртен.
Тудо Марий Турек районын 100 ияш лӱмгечыжлан пӧлеклалтын. Сандене тушко Йошкар-Олаште Марий Турек землячествын еҥже, учёный, краевед, журналист-шамычат ушненыт. Национальный, краеведений литератур пӧлкаште эртыше вашлиймашке «Рассвет земли Онара» ден «Утро земли Онара» книга-влакын авторжо, журналист, историк, Н.И.Заболоцкий лӱмеш сылнымут премийын лауреатше, Марий Турек районын шочшыжо, кызыт Озаҥыште илыше да пашам ыштыше Руслан Бушков толын. Историй науко кандидат Марий Турек велын историйжым, тудым веле огыл, республикым чапландарыше еҥ-влакын биографийыштым шукертак шымла.
Вашлиймашлан книгагудо пашаеҥ-влак лӱмын марий историк, Российысе наукын сулло деятельже Алексей Васильевич Хлебниковлан, икымше марий социолог, республикысе наукын сулло пашаеҥже Виктор Степанович Соловьёвлан пӧлеклалтше ончерымат ямдыленыт.
Конференцийыш ушнышо-влак Р.Бушковын книгажым налын да сӱретче А.С.Тихоновын пашажым ончен кертыныт.
Конференцийым «Йыргешке ӱстел» йыр мутланымаш шуен. Туштат район нергенат мутланеныт. Тушко Марий Турек район вуйлатыше Лариса Яндыбаева, лӱмлӧ краевед-влак, В.М.Васильев лӱмеш МарНИИЯЛИ директор Людмила Григорьева да молат ушненыт.
Светлана Носова
Снимкыште: вашлиймаш годым.
Фотом книгагудын лаштыкше гыч налме.
