Шернур районысо Шӱдымарий кундем гыч театр искусствым вияҥдымашке надырым пыштыше ӱдыр-рвезе-влак ятырын улыт. Нунын кокла гыч иктыже – Марий самырык театрын актрисыже Надежда ИБАШЕВА.
Ты коллективыш тудо И.С.Палантай лӱмеш тӱвыра да сымыктыш колледжыште тунеммыж годымак ушнен. Поро кумылан, ушан-шотан да кӧргӧ вий-куатан актрисе ынде коло кок ий шкешотан да ойыртемалтше рольжо дене калыкым куандара, тургыжландара да шонаш тарата.
Ӱдырлан артист лияш кӧ темлен? Драмыште, комедийыште але йоча йомакыште тудлан модаш келша? Нине да моло нерген шкеж дене мутланышна.
– Надя, могайрак икшыве кушкында?
– Шуко шочшан ешыште кушкынам гынат, йоча годым вожылшырак лийынам. Туге-гынат йоча-влак дене, тӱшкан погынен, шылын, футболла, лаптала модаш йӧратенна, вет тунам ялыште икшыве-шамычат, тукым иза-шольо, ака-шӱжар-влакат ятырын лийынна. Садлан йоча юарлыме йӱк торашкак шергылтын. А парт коклаш шичмеке, тунеммашлан жапым утларак ойыраш тӱҥалынна. Урок деч вара мӧҥгӧ толмеке, эн ончычак сурт сомылкам ышташ полшенна, вара веле модаш лектынна.
– Изида годым кӧ лияш шоненда?
– Тӱҥалтыш класслаште тунемме годымак театр кружокыш коштынам, мурашат, кушташат пеш келшен. Изинекак спортланат шӱман кушкынам. Куржталме, ече денат тӱрлӧ таҥасымашке чӱчкыдынак ушненам. Шахмат дене эсогыл районысо ӱдыр-влак коклаште эн виян лийынам. Ача-авамат, Зоя Николаевна ден Александр Иванович Шарабуевмыт, ты модыш дене модаш чот кертыт, ик гана веле огыл коклаштына турнирым эртаренна. Кызытат каныш кечылаште ма але отпуск жапыште ялыш мийымеке, ачам уныкаже-влак дене шахмат дене модеш.
Школышто туныктышын урокым вӱдымыжым, икшыве-влак дене пашам ыштымыжым кажне гана йӧратен онченам, садлан икымше туныктышем Софья Федотовна Рыбакова семын туныктышо лияш шоненам.
– Кушмо семын шонымашда вашталтын, артист лияш кӧ темлен але кузе ты профессийым ойырен налында?
– 9-ше класс деч вара тӱвыра да сымыктыш колледжын «театр» пӧлкашкыже ӱдыр-рвезе-влакым погымо нерген уверым колынам ыле да шкемым терген ончаш лийынам. Такшым Марий самырык театрын артистше-влакым мемнан кундемыш гастроль дене мийымекышт спектакльышкышт куанен вашкенам. Артист лияш шонымашлан тӱҥалтышым, очыни, тидат ыштен. Ача-авамат профессийым ойырен налме шотышто нимо удам каласен огытыл, йочан кумылжым шотыш налыныт. Тунемаш пураш чо-отак ямдылалтынам: почеламутым, басньым, «Окса тул» прозо гыч монологым ямдыленам. Школышто сайын тунеммат студент радамыш ушнаш сай шӱкалтышым ыштен.
Ача-ава деч тораште да эше палыдыме олаште илаш тӱҥалтышлан йӧсын чучын. Курсышто пырля тунемше-влак кокла гыч эн изирак лийынам, молышт я латикымше класс, я армий деч вара тунемаш толыныт улмаш. Арня еда шочмо суртышкем чоным почын возымо серышемак веле пырткыше шӱмем лыпландарен, волгыдо ӱшаным шочыктен.
Материалым тичмашнек «Марий Эл» газетыште лудаш темлена!
А.БАЙКОВА
Авторын фотожо
