Марий Элым вуйлатыше Юрий Зайцев тӱзатыме программын кугу лектышыж нерген увертарен да республикыште илыше-влакым йӱклымашке ушнаш ӱжын.
Регион вуйлатышын мутшо почеш 2019 ий гыч «Оласе кумдыкым йӧнаным ыштымаш» проект кышкарыште республикыште 612 объектым шотыш кондымо. Чыла паша «Единый Россий» партийын калык программыж полшымо дене илышыш шыҥдаралтеш.
Калыкын ик эн йӧратыме верышкыже савырныше коклаште 2024 ий ноябрьыште почмо Марий паркым ончыкташ лиеш. Тыгак пытартыш ийлаште Железнодорожник-влакын скверыштым, Сеҥымаш паркым, Чавайн бульварым, «Тарханово» паркым, Волжск оласе рӱдым, Медведево посёлкысо паркым уэмдыме.
2026 ийыште эше 70 верым тӱзаташ палемдыме. 12 июнь марте, Госуслуго порталыште zagorodsreda.gosuslugi.ru ссылке почеш эртен, вес ийын тӱзатышаш вер-влакым ойырымо дене кылдалтше йӱклымаш эрта, ушештарен шке воткыл лаштыклаштыже Юрий Зайцев. «Сеҥыше проектлам «Илышлан кӱлешан инфраструктур» нацпроект почеш илышыш шыҥдарена. Олана ден селана-влакым илаш йӧнаным ыштена!» – каласен Юрий Викторович.
«Оласе кумдыкым йӧнаным ыштымаш» проект ӱмашсе гыч «Илышлан кӱлешан инфраструктур» нацпроектыш пура. Тудым РФ Президент Владимр Путинын кӱштымашыж почеш ыштыме. «Оласе кумдыкым йӧнаным ыштымаш» проект почеш йӱклымаш 2021 ий гыч эртаралтеш.
Михаил Скобелевын фотожо/ «Марий Эл» увер агентстве
