УВЕР ЙОГЫН

Ойыртемалтше еш-влакым чапландарат

7 июльышто, рушарнян, Йошкар-Олаште Еш, йӧратымаш да икте-весылан ӱшанле улмо кече вашеш ятыр мероприятий лиеш.

 

Тӱвыра да каныме рӱдӧ паркыште 13 гыч 17 шагат марте кидмастар-влакын тӱрлӧ тематический ончерышт, мастер-класс-влак эртаралтыт.

14 шагатлан мероприятийын  торжественный ужашыже тӱҥалеш. Тушто 5 ешым Марий Эл Республик Вуйлатышын «За достойное воспитание детей» Почетан знакше дене палемдат. 17 ешлан «За любовь и верность» медальым кучыктат. Тыгак «Идалыкын ешыже» республиканский конкурсышто сеҥыше-влакым да тиде кечын мужыраҥше-шамычым саламлат. Нуным да мероприятийыш толшо-влакым шке выступленийышт дене республикысе усталык коллектив-влак куандарат.

Тиде паркыштак 11 гыч 17 шагат марте СВО-што улшо-влаклан полшаш оксам погымо поро кумылым ончыктымо ярмиҥга эрта.

 

Сеҥымаш паркыштат мероприятий-влак лийыт. Тушто 16 шагатлан  уло ешлан «Таза тукым» спорт программе эрта. 17 шагат пелылан кумылан-влак «Еш – пиал отро» модыш программыш ушнен кертыт. 19 шагатлан кава йымалне «Пара из будущего» фильмым ончыктат.

 

Никонов площадьыште 17 гыч 18 шагат марте республикысе артист-влакын концертышт лиеш. Тылеч вара Москва гыч толшо уна Александр Добронравов мурылаж дене куандара. Умбакыже калык ончыко Михаил Мосунов ден «АППЕРКОТ» группо лектыт. 19 шагатат пелылан тиде площадьыште куштымо марафон тӱҥалеш.

Пайрем вашеш ямдылыме программе 21 шагатлан Тӱвыра да каныме рӱдӧ паркыште «Колесо обозрения» аттракционышто светомузыкальный шоум ончыктымо дене мучашлалтеш.

Л.Камалетдинова

Опубликовать в Одноклассники

Добавить комментарий