Россий мучко «Образованийын флагманже-влак» профессионал мастарлык конкурсын регионысо пелефиналжылан ямдылалтме паша тӱҥалын.
Марий образований институтын пашаеҥыштын увертарымышт почеш, Марий Элыштына тиде конкурс тений октябрьыште лиеш.
Ушештарена, профессионал мастарлык таҥасымаш Россий Просвещений министерствын полшымыж дене «Россий – йӧным пуышо эл» платформышто эртаралеш.
Кызытлан тушко ушнаш йодмашым налме паша мучашлалтын, а тудыжым ты гана Россий Федерацийын 89 регионжо гыч 100 тӱжем утла еҥ (образований сферыште вуйлатыше сомылым шуктышо, туныктышо да студент-влак) пуэн. Марий Эл гыч регистрацийым 470 утла еҥ эртен.
16 август гыч участник-влакым дистанций йӧн дене аклаш тӱҥалыт. Октябрьыште республикна гыч 30 эн сай вуйлатыше, педагог да студентым ойырат, нуно пелефиналыште мастарлыкышт ончыкташ тӱҥалыт. Тудыжо Марий образований институтышто эртаралтеш. Финал тений ноябрьыште Москваште лиеш.
Г.Кожевникова
