13 майыште Морко калык театрын артистше-влак М.Шкетан лӱмеш Марий национальный драме театрын сценыштыже «Нурмучаш Валюш» спектакльым ончыкта.
Ф.Ярулинын татар пьесыжым марлашке Марий Эл культурын сулло пашаеҥже, театр вуйлатыше Анна Якушева кусарен да сценыш лукташат шкежак ямдылен.
– Пьесым марлаҥдаш кок ий наре жап каен, – манеш Анна Васильевна. – Текст гыч кораҥде, мут йыжыҥжым арален кодашак тыршенам. Артист-влак дене кужун пашам ыштенна. Спектакльым лукташ ямдылен шуктымеке, моткоч йывыртенам, ласка-ан шӱлалтенам.
Спектакльыште действий ялыште эрта. Тушто кок пошкудын эргыж ден ӱдыржын илышыже ончыкталтеш. Нуно изинекак пырля кушкыныт. Рвезе олаште тунемеш, а пошкудо ӱдыр тудын ача-аважлан сурт сомылкам ышташ полышкалаш коштеш. Кугурак-влак ӱдырым шешке манын ойленыт. Валюшат Ольошыжо садак тудым марлан налеш манын шонен. Телеграмме толеш, ӱдыр мотор тувырым чиен шогалеш…
А умбакыже мо лиеш? Тидым ме театрыш мийымеке, пален налын кертына.
Ушештарена, морко артист-влак Шкетан театрыште «Салика», «Янлык пасет», «Мӱкш отар», «Кунам ломбо пеледеш» спектакль-влакым ончыктеныт.
А.БАЙКОВА
