25 августышто Туруново шӱгарын аллейыштыже специальный военный операцийыште вуйым пыштыше боец-влакым шарныме лӱмеш «Древо памяти» стелым официально почыныт. Тушко спецоперацийыште участвоватлыше-влак, нунын родо-тукымышт, ача-авашт чумыргеныт.
Символический тасмам Йошкар-Ола мерын алмаштышыже Сергей Мухортов ден специальный военный операцийыште ӱмыр лугыч лийше Российын Геройжо Дамир Шаймардановын аваже, тачысе кечылан КСВО муниципальный штабын вуйлатышыже Ирина Шаймарданова пӱчкыныт.
Памятникым Александр Васенин ямдылен. Композиций шуко шонкалаш таратыше. Пушеҥгын вожешыже кӱм оптымо. Тидыже кӱ ора гыч «кушкын лекше» пушеҥгым ончыкта. Тудо чыла нелылыкым чытен лекмын символжо семын палемдалтын. Кок кӱм Донецк областьысе Волноваха ола гыч конденыт.
Меҥгеш «Z» буквам возен келыштарыме. Тыгак скульптурыштыжо мландышар ден военнослужащий-влакын кидыштым ончыктымо. Стелым ыштыше мастарын палемдымыж почеш, тидыже салтак-шамычын кумылыштым ончыкта: нуно тыште, мемнан дене пырля улыт, мемнан илышнам, тынысым, ласкалыкнам оралат. А шым кӧгӧрчен ончыкылык волгыдылан ӱшаным пуэн шогымо дене кылдалтын.
Елена Эшкинина
