Вич ий ончыч Марий Элым Александр Евстифеев вуйлаташ тӱҥалын.

Тудым 6 апрельыште республикым вуйлатышылан шогалтеныт. Но тунам Александр Евстифеев эше ты сомылым жаплан шуктышо веле лийын. Сандене 2017 ий 10 сентябрьыште йӱклымаш эртаралтын да Александр Евстифеев Марий Эл вуйлатышылан сайлалтын.

Тылеч вара кугу паша тӱҥалын. Да, мутат уке, чылажат ончыкыжым кундемыштына илышым эшеат сайракым ышташ виктаралтын. Кугу полышым лач ты жапыште Российыште национальный проект-влакым шыҥдараш тӱҥалме пуэн. Тыге, ты йӧн дене пайдаланен, тӱрлӧ сферыштат ситуацийым тӧрлаташ манын, республик кажнышкыже гаяк ушнен. Тыгак региональный проект-влакат илышыш пурталтыныт.

Кундемыштына илыше-влак шкештат сай велыш вашталтыш-влакым ужыт, очыни. Вет пытартыш ийлаште Марий Элыште 18 у йочасад почылтын да эше мынярыште ешартыш вер ышталтын?! Тыге тидын шотышто вашлиялтше нелылык кызыт тӱрыс кораҥдалтын. Икмыняр у школ ден ФАП шке омсаштым почыныт. Тыгак турист-влакым мемнан деке толаш утларак кумылаҥдаш манын, ятыр кугу паша шукталтеш.

А республик мучко мыняр километр кужыт корно чоҥалтын але уэмдалтын?! Арам огыл тений март мучаште РФ правительствын палдарымыж почеш, корным чоҥымаш дене элын регионжо-влак коклаште Марий Эл 4-ше верыш лектын! Тиде кузе огеш куандаре? А вашке республикыште кеч-могай кугорно да корно дене эшеат ласка-ан кудал колтена манын ӱшан уло, вет тений гына 49 объектыште тыгай сынан паша шукталтшаш. Шушаш ийыште гын корным чоҥымо да тӧрлатыме дене кылдалтше программыш эше 53 объект пурталтын. Марий Элыште вич ий жапыште чылаже 285 инвестиций проектым илышыш пуртымо. Нунын тӱрыс окса кугытышт – 23 миллиард теҥге. Тыгак эше 25 миллиард теҥге кугытан 140 проект шыҥдаралтеш. Ты шотышто регион 58-ше гыч 20-шо верыш нӧлталтын. Тиде – изи огыл лектыш!

Проект-влакым илышыш шыҥдарыме паша умбакыжат шуйна. Кызыт Марий Эл 11 национальный проектыш ушнен тырша. Нунын кышкарыште 47 региональный проект дене келшышын паша шукталтеш. Тидлан 2024 ий марте 68 миллиард теҥге ойыралтшаш. Эшежым 2024 ий марте Марий Элым социально-экономически вияҥдыме индивидуальный программым ямдылыме. Тудын дене келшышынат федеральный бюджет гыч 5 миллиард теҥге ойыралтеш. Мо куандара: РФ правительствын пунчалже дене ончыкыжым тудым 2030 ий марте шуен кертыт.

Иктешлен каласаш гын, ончыкыжым илышна эшеат саемеш манын шонаш чыла амал уло. Кеч коронавируслан кӧра кок ий жапыште республиклан ятыр нелылык гоч эрташыже пернен. Кызытат чер тӱрыс пытен огыл да инфекций ваштареш кучедалшашлан тӱрлӧ мере ышталтеш. Икмыняр моло шотыштат сӱрет куштылгыжак огыл. Но такшым илыш кунам нелылык деч посна лийын? Сандене кызытат, тудым сеҥен, умбакыже кайыман. А республик вуйлатыше лач тыгаяк кумылан.