Юл кундем кугыжаныш технологий университетыште «Наукыш икымше ошкылем» XIV научно-образовательный форум лийын.
Школышто тунемше-влаклан эртаралтше мероприятийыште 25 секций пашам ыштен. Кажныштыже йоча-влак шке проектышт дене палдареныт. «Тыгай форумышто школышто тунемше-влак уш-акылым да шымлыме моштымашым вияҥдат, усталык проектыштым илышыш пуртат, гражданский позицийыштым ончыктат», – палемден Марий Эл образований да науко министр Лариса Ревуцкая.
Мероприятийыште йоча-шамычым научно-технический ончер дене палдареныт, нунылан Волгатехын факультетше ден институлаштыже экскурсийым эртареныт.
Форумын кажне участникшылан сертификатым кучыктеныт, лаурета-влакым диплом дене палемденыт.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
