Йошкар-Оласе Чарла Кремльыште историй реконструкций дене кылдалтше «Наследие» фестиваль лийын. Тудым Марий Элын Тӱвыра, савыктыш да калык-влакын пашашт шотышто министерствыже, «Чарла Кремль» ден Юл кундем кугыжаныш технологий университет пелен «Юл корно» рӱдер-влак эртареныт. Тушто лийше еҥ-влак пуйто ик татлан кокла курымыш пӧртылыныт да нунын коклаште мыят лийынам.
Фестиваль тӱрлӧ регион гыч историй клублан еҥже-влакым чумырен. Икте пикш дене мастарын лӱйкала, весе тунамсе жапын вургемже дене палдара, а кумшо кокла курымысо саргурал дене кредалеш… Но эн тале сарзе-влак Шупашкар да Озаҥ ола гыч улыт манын шоналтышым: нуно, шокшо игечым ончыде, пеш виян кредалыныт. А могай ӱдыр-влак толыныт! Житарьмыт ешым налаш, тудо – Удмурт Республик Глазов оласе «Ратоборцы» клуб гыч. Ешын озаже Александр Марий Элыште шочын-кушкын. Пеленже Екатерина пелашыж ден Мария ӱдыржым конден.
Ӱдырамаш сӧрастарышым, тыгакшун ате-шамычым ыштыше Елена Склярова Набережный Челны ола гыч толын.
– Мыланем олада пеш келшыш, эше ик гана толаш шонем! – каласыш тудо.
Тольятти ола гыч кидмастар Венцеслав Бочков калыклан «Ижсталь» предприятиын кӱртньӧ гыч шке ыштыме товарым, кӱзым, тыгак пушеҥге гыч пӱчкедыме сатум темлен. Виче кундемысе Слободской ола гыч «Скотланд» ден «Хлынов град» команде-влак вургемышт дене куандареныт. Йошкар-Ола гыч Александр Нагаев булгар ӱдырамашлан шергашым, йоча-влаклан кердым ыштыш.
– Мый ынде молгунамсе семын ом кредал. Тошто ӱзгарым, йоча-шамычлан модыш кердым веле ыштылам. Тыгай фестиваль у шонымашым шочыкта, адакшым йолташ-шамыч дене вашлияш йӧным ышта, — мане шкеже.
М.СКОБЕЛЕВ