Лӱмгече
«Мый чон вошт колтыде возен ом керт…»
Марий Элын сулло журналистше, Россий тӱвыран сулло пашаеҥже Иван Алексеевлан – 70 ий
Рӱдӧ марий газетнан пӱрымашыжак тыгай, очыни: тыште ыштыше кокла гыч мынярын вес пашаш каеныт, но икмыняр жап гыч садыгак мӧҥгӧ толыныт. Мемнан лӱмгечызынат, Иван Иванович Алексеев, кум гана – Марий телевиденийыш отдел редакторлан, «Кугарня» газетыш тӱҥ редакторлан, Йошкар-Ола горкомыш идеологий отдел вуйлатышылан – каен да кум ганажат пӧртылын. Пӧртылыныт тугай-влак, кӧмыт чынжымак журналист улыт. Иван Ивановичат ты корным изинек ойырен налын, школ гычак газет дене кылым кучаш тӱҥалын – почеламутым, изи ойлымашым, заметкым возгален. Сандене ты паша тунамак вӱрышкыжӧ шыҥен.
Вуз деч вара редакцийыш толын, кужу жап ялозанлык, вара серыш, совет паша, партийный илыш отделлаште ыштен. Тыглай корреспондент гыч тӱҥалын, отдел вуйлатыше, вара тӱҥ редакторын алмаштышыже марте кушкын. Кеч-могай теме дене возымо годымат тудо кукшын увертарыме дене серлаген огыл, а келгыш шыҥаш, чон вошт колташ тыршен. «Мый чон вошт колтыде возен ом керт», – манеш ыле тудо.
Иван Иванович такшымат вургыжшо чонан. «Вашке ылыж кайымем дене фронтовик ачам Иван Алексеевич гай, а паша кучем да шонкалымаш дене авам Ирина Яковлевна гай улам», – шыргыжалын коклан. Почылтшо чонан айдеме шке шонымыжым весылан шылтыде ойлен пуэн кертын. Тидыже южыштлан келшен огыл, сандене нелешат налыныт. Но кӧргыж дене тудо садыгак поро лийын. «Мый утларакше поро шӱлышан материалым возаш йӧратем. Порылык ончыкылан ӱшаным ешара», – каласен тыгай годым.
Пелашыжымат, Лидия Алексеевнам, поро кумылан улмыжлан, умылен моштымыжлан йӧратен. Тудыжо кумло ий утла Йошкар-Оласе 29-ше №-ан школышто тӱҥалтыш класслам туныктен. Икшыве-влак тудым йӧратеныт, ача-ава-шамыч пагаленыт.Нылле ий утла пырля иленыт. Пелашыжын илыш гыч кайымекыже, тудо кужун тургыжланен. Тидыжат, очыни, тазалыкшым лунчыртен. Но неле годым Ирина ӱдыржылан эҥертен, вет тудат шкеж семынак журналист корным ойырен налын, да Игорь уныкаж дене чонжым лыпландарен. Да кызытат нунак тӱҥ эҥертышыже улыт.
Иван Иванович ончычсо семын редакцийышкына толын ок керт гынат, газетна дене кылже кӱрлын огыл, тудым мӧҥгыштыжӧ лудеш, пашаче ешна нерген умылкалаш тырша. Ме тудлан пеҥгыде да таза лияш, «Марий Эл» газетланна тугаяк ӱшанле кодаш тыланена.
«Марий Эл» газетын пашаче ешыже
Снимкыште: тӱҥ редакторын алмаштышыже И.Алексеев (шолаште) – редактор-влак Ю.Исаков да В.Смоленцев дене пырля.
М.Скобелевын фотожо
