«Россия 1» рӱдӧ телеканалыште ончыктымо «Шоу Андрея Малахова. Песни от всей души» передачышке Михаил Веселов нерген сниматлаш шочмо кундемышкыже съемочный группо толын кайыме нерген возенна ыле. А кодшо кечылаште тудым шкенжымат Москвашке ӱжыныт. Тушто съёмко кузе эртен? Мо келшен? Тиде да икмыняр моло нерген Михаил Веселовын тушеч пӧртылмекше мутланышна.
– Миша, пытартыш гана мутланымына годым Москвашке кунам кайышашет шотышто эше раш пале огыл, тиде 7 але 8 ноябрьыште лиеш манын ойленат ыле. Ынде содыки кунам миенат? Съёмко кунам лийын?
– Москвашке самолет дене кайышаш улам ыле. Но тӱрлӧ амаллан кӧра 6 ноябрьыште поезд дене кайышым. Эрлашыжым эрдене, миен шумеке, мыйым вокзалыште вашлийыч да вигак Горький лӱмеш киностудийыш наҥгайышт. Тушто ончычшо ямдылалтмаш лие. Мутлан, кӧ йокмам намиен гын, тудым чыла корзиҥгашке оптымо.
– Тугеже тыят намиенат? Секрет огыл гын, мом?
– Намиенам. Москвашке наҥгаяш лӱмынак шкеак кугу когыльым кӱэштынам ыле да тудым, ялысе муным, поҥгым да эше … пыштенна. (Тиде мо лиймым возаш огеш лий докан. Но унала кайыме, поснак ял гыч олашке мийыме годым шукынжо мом наҥгаят – шкеат сайын умыледа, шонена… – авт.)
– Илаш унагудыш пуртеныт?
– Туге. Тудо пеш чапле ыле. Тушто «всё включено» манме йӧн дене «шведский ӱстел» лийын.
– А съёмко мынярлан тӱҥалын?
– Съёмко 7 ноябрьыште 11 шагатат пелылан тӱҥале.
– Тылеч ончыч тый денет редактор-шамыч пашам ыштен да мом ойлышашым, мом каласаш кӱлмым умылтарен огытыл? Изирак репетиций лийын огыл?
– Уке. Тыгай лийын огыл. Могай йодышым пуэныт, тудлан вигак вашештыме. Темлымашым гына ойлышт: тургыжланаш огыл, шкем ласкан кучаш, шыргыжаш да мутланаш.
Передачым сниматлыме годым мемнам, ӱжмӧ уна-влакым, вигак чыланнамат ӱстел йыр поген шындышт да икте почеш весе дене палымым ыштышт. Тиде гана Курган, Донецк, Москва областьла, Пермь край, Армений, эше икмыняр моло кундем гыч улыт ыле. Съёмко кум этап дене эртыш. Мый, мутлан, икымше этапыште лийым, визымше ала кудымшо каласкалыше улам ыле. Вара мыйым кораҥдышт да весе-влакым шындышт.
– Передачым Андрей Малахов вӱда да, мутат уке, йодышымат тудак пуэда. Тый дечет мо нерген йодышто?
– Тыгай мастарлык кунам палдырныме, кунам мураш тӱҥалмем нерген йодо. Мый 2017 ийыште кугу сценыш лектынам, а такшым изиэм годымак тиде палдырнен, авамын мӱшкырыштыжак мурен, куштен киенам, маньым. Тыге каласымем колын, чылан воштыльыч (шкежат воштылеш – авт.)
– Йодыш-влаклан вашештымет, каласкалымет годым тургыжланенат? Лӱдмет дене йӱкет, кидет, йолет чытырен огытыл, содыки вет тиде рӱдӧ телевидений!
– Уке, йӧршынат тургыжланен, чытырен омыл. Мӧҥгешла, съёмко деч ончыч мый передачын моло геройжо-влакым лыпландаренам, «тиде тыгаяк концерт манын шоныза, да чыла» манын ойленам, кумылыштым нӧлталаш тыршенам.
– А тый шуко кутыренат?
– Уке. Чылажымат кӱчыкын да писын каласкалыме. Молан манаш гын, ойлышым, съёмко кум этап дене эртен, да жап шукыжак лийын огыл. Сандене ялыште сниматлыме гычат передачыш йӧршеш шагал пуртеныт. Шукыжо ӧрдыжеш кодын.
– Пеш жалкы-ыс! Тыйже вет тунам шочмо селаштет лӱмынак марий дискотекым эртарышыч, калык шукырак лийже манын, соцкылласе лаштыклашкет еҥ-шамычым толаш ӱжын возенат, да ятырынак миеныт ыле. Эсогыл меат тушко ушненна да пӱжалт пытымешке куштенна, муренна! Шукынжо, Российын рӱдӧ каналже дене пӱтынь эллан ончыктат шонен, чотак тыршышт! Тугеже ынде шкеныштым огыт уж…
– Тунам Кугу Пумарий тӱвыра пӧртыш погынышо-влаклан «вашке шкендам телевизор дене ужыда» манынам ыле. Уке. Дискотеке нерген сюжет, авам дене лийме, мӧҥгыштӧ подкогыльым ыштымем, ешем – нимат пурен огыл. Чыла сниматлымышт гыч ялым кӱшычын, ялын лӱмжым, мыйын пум шелмем, кутырен шогымем, Вочармаште мелнам кӱэштмым да ӱстел коклаште мутланен шинчымым гына налыныт.
– А Москваште съёмко жапыште тылат мо келшен? Мо ӧрыктарен? Мо келшен огыл?
– Мылам тушто чыла келшен. Съемкыш пеленем мый эше Москваште пашам ыштыше кок чолга ӱдырамашым – Любовь Канаева ден Галина Сагельдинам – да Екатеринбургышто марий дискотекым эртарыше Владимир Биктимировым намиенам ыле. Нуныланат чылажат моткоч келшен.
– Нунат передачыште иктаж-мом ойленыт?
– Уке. Ончышо семын лийыныт да сем, муро йоҥгымо годым, кумылышт лийын гын, моло дене пырля куштеныт. Мутлан, мыйын «Эртенат, каенат, пӧртылынат» (мутшат, семжат шкенжын – авт.) мурым гармонь дене шоктен мурымем годым кӧ залыште лийын гын, чылан верышт гыч тарваненыт да кушташ лектыныт! Передачыште баяным да гитарым профессионально шоктышо-влак улыт ыле. Нуно вараже ойлышт: «Кумылым тынар нӧлталше, чоныш логалше да тыге чот кушташ таратыше, илышлан, сай, пиалан ончыкылыклан тыгай кугу ӱшаным пуышо сем ден мурым икымше гана колынна». Съёмко пытымеке, икмынярынже тиде муремым шке телефонышкышт вызовлан шындаш манын колташ йодыч. Передачыш сниматлаш ӱжмӧ еҥ-влак вараже чылан гаяк икте-весынан номернам нална да ончыкыжым ваш-ваш кӧм кушко выступатлаш ӱжаш лийме нерген мутланышна.
– А Андрей Малахов могайла чучын? Шкенжым кузерак кучен?
– Ой, тудо моткочак проста! «Мый Малахов улам!» манме койышыжо йӧршын шижалтын огыл! Тыглай пӧръеҥ. Почти марий! (воштылеш – авт.)
– Съёмко деч вара, очыни, чыланат тудын дене пырля фотографироватлалтында?
– Туге. Эн ончычак писын гына тӱшка фотом ыштышна, а вара кажныже тудын дене посна фотографироватлалтна.
– «Ой, кузе те чылан мыйын шерем теменда!» манме семын койын огыл?
– Уке-уке! Тудо чылашт дене мутлана, чылаштым колыштеш, кажне еҥ дене кумылын фотографироватлалтеш. Лач изиш вашкен, молан манаш гын мемнан деч варат съемкыжо лийын, да ямдылалташыже кӱлын. Тыгак фотографий шотышто мемнам шижтареныт: передаче эфирыш лекмешке, нимогай соцкылыш, сайтыш нуным вераҥдаш огыл. Сандене тыландат газетыш савыкташ колтен ом керт.
– А передачыжым кунам ончыктат?
– Эше раш пале огыл. Кунам мылам каласат, тидын нерген уверым соцкылласе лаштыклашкем возем.
– Пытартышлан йоднемак: Миша, тыйым Российысе ик эн тӱҥ телеканалышке сниматлыме чот куандарен докан? Содыки вет тушко кажне еҥымак огыт ӱж. Тидым сулаш кӱлеш!
– Куаненам такше. Кеч мылам эше ӱмаштак 26 ноябрьыште Москваште съёмко лиеш манын ойленыт ыле. Но вара ала-могай амал дене тиде «мондалтын». Тунам шканем маньым: «Тидын нерген шонкалаш ом тӱҥал. Лийшаш гын, садак лиеш». Рушла ойлаш гын, мый тидын нерген мечтатленат омыл, а шукталтын. Передачым ямдылыше-шамыч ютубышто «Эртенат, каенат, пӧртылынат» мурем ик эн шуко гана ончымым да «лайкым» шындымым ужыныт да шкешт мыйым кычал муыныт. Кеч такшым кажне кечын мо нерген гынат, адакат рушлак каласынем, мечтатлыман. Тудо садак кунам-гынат шукталтеш.
Любовь Камалетдинова мутланен
