Шукерте огыл «Гастрономическая карта России» федеральный проект кышкарыште мемнан республик гыч мийыше-влак Мурманск оласе «Печенега» трактирыште марий калык кочкыш дене палдареныт.
Марий Элыште ты проектын участникшылан «Теплая речка» трактирын озаже-влак Юлия ден Иван Антроповмыт шотлалтыт. Нуно тушко Мурманск областьын туризм шотышто комитетшын полшымыж дене каеныт.
Мом вара тушко намиеныт: Чарла окорокым, иленек коштымо ирсӧсна, тыгак моло ир янлык шыл гыч шолтымо солянкым, кӱрка шыл гыч подкогыльым, команмелнам, ӱячам, йыван-чайым, мӱйым.
Марий чес дене палдарыше касым Йошкар-Ола гыч «Шып лий» (Денис Шаблий) репер сӧрастарен. Тудо марий йылме дене икмыняр мурым йоҥгалтарен. Реперын палемдымыж почеш, тиде кас марий сӱаным ушештарен: марий да руш калык кочкыш дене сийленыт, весела сем йоҥген. «Команмелна», «Пеледыш пайрем» муро-влакым сайын вашлийыныт.
«Верысе кум марий еш касыш лӱмын миен. Ты мероприятий нунылан шочмо кундемым да калыкшым, йӱлажым шарныктен. Чылажат ончылгоч палемдыме почеш лектын», – серен шке воткыл лаштыкыштыже Иван Антропов.
Светлана Носова
Снимкыште: И.Антропов ден Денис Шаблий.
Фотом Д. Шаблийын воткыл лаштыкше гыч налме.
