Социальный услуго наборым налаш праван граждан-влак льготышт дене кузе пайдаланаш тӱҥалмыштым 1 октябрь марте рашемдышаш улыт.
Неле черан пациент-влак южгунам льготан эмлыме препарат олмеш оксам налаш кумылым ончыктат. 2021 ийыште социальный услуго набор гыч эмлан 933 теҥгеат 25 ыр ойыралтеш. Тыгодым сакыр диабет, склероз, бронхиальный астме, осал пуалше гай неле чер-влак дене орланыме годым шергакан эм кӱлеш. Мутлан, склероз деч препаратын ик флаконжо икмыняр шӱдӧ тӱжем теҥгеш шуын кертеш.
2005 ий гыч илышыш пуртымо Льготан эмым ситарыме федеральный программе социальный услуго наборым ойырен налше граждан-влаклан шергакан препарат дене эмлалташ сай йӧным ышта. Да тиде посна пациентлан ойырымо суммо дене йӧршынат кылдалтын огыл.
– Пациент-шамыч кокла гыч иктажше эртыше ийын социальный услуго набор олмеш оксам ойырен налын гын, тений 1 октябрь марте, верысе Пенсий фондыш миен але Кугыжаныш услуго порталыш пурен, льготым пӧртылтымӧ нерген йодмашым пуэн кертеш. Тыгеже тудо 2022 ий 1 январь гыч эмым яра налаш тӱҥалеш, – умылтара Марий Элын тазалыкым аралыме министржын алмаштышыже Юлиана Зейтулаева (снимкыште).
М.ИВАНОВА
