СОЦИАЛ ИЛЫШ

Кудалаш йывыжа лиеш

«Марий Эл Дорстрой» акционер обществын Морко районысо филиалжын пашаеҥже-влак Звенигово-Шолэҥер-Морко кугорнын 36 гыч 94 километр кокласе начар участкыштыже чумыржо кум тӱжем квадрат метр кумдыкым олмыктеныт. Автомобиль кудалыштмылан кӧра локтылалтше ӱмбал лончыш уэш асфальтым шарыме. Пассажир-влаклан автобусым але маршруткым вучаш, нуным шындаш леведышан йӧнан площадкылам ыштыме. Шолэҥер, Памаштӱр, Керебеляк (Памашсола) кундемысе чыла павильонышто тыгак асфальтым угыч шарыме да бордюрым келыштарыме. Овдасолаште у автопавильоным чоҥымо.

Районышто корным ыштыме да олмыктымо паша умбакыже шуйна. Кызыт строитель-влак ты участкынак 65 ден 67 километр коклаштыже тыршат, Морко-Унчо корнын 27-36 километрыштыже, Памар-Коркатово участкыште олмыктат. Лишыл жапыште Морко поселкыш пурыде, йыр эртен кудалме корным олмыкташ тӱҥалыт.

92 еҥан коллектив 18 тӱрлӧ техникым пайдалын кучылтеш, сандене лектышат уда огыл. Тылеч посна строитель-влак улшо корным сайын кучаш шагал огыл вийым пыштат. Кызыт корно ӧрдыжтӧ шудым солат, шӱкшакым эрыктат, корнысо знак-влакым шотыш кондат.

А.АНДРЕЕВ.

 (МариАвтон фотожо).

(Фото: Сервер, В номер, Андреев, Дороги-ремонт-фото).

Илен шуыныт, коеш

Курыкмарий межрайонный прокуратурыш Козьмодемьяскысе Куба микрорайонышто илыше-влакын тӱшкан возымо вуйшиймашышт пурен. Нунылан ты кундемым тӱзатыме, оласе корнылам да изи архитектур формым начарын кучымо шотышто муниципальный властьын нимом ыштыдымыж нерген ойлалтеш. Прокуратурын тергымыж годым серышыште ончыктымо чыла экшыкым улшылан шотлымо.

Правам аралыше орган тыгак палемден: «Козьмодемьянск ола» округын администрацийже лач тудын шуктышаш ятыр йодышым ок решатле. Мутлан, муниципальный образований кундемым тӱзатыме пашам шӧрын онча. Тидлан кӧра еҥ-влаклан лӱдыкшыдымылыкым да илаш йӧным ыштыме шотышто правашт торжан пудырталтеш.

Куба микрорайонышто Тургень эҥер гоч пу кӱвар да тушко кӱзаш тошкалтыш чот тоштемыныт, теве-теве сӱмырлат, шонет. Тудын гоч эрташ йоча ден илалше еҥ-влаклан поснак шучко. Преовражный уремыш вончымо тошкалтыш оҥа верын-верын кӱрлын кечалтын, южо вере йӧршеш уке, кучен вончаш перил кучем ышталтын огыл.

Тенийсе йӱран игечыште микрорайонын частный илыме верыштыже уремлаш вӱд темеш, кузе вончаш от пале. Правда, Чехов, Лесной, Свобода, Пролетарский уремлаште мланде корно дене кудалаш автомашина-влаклан лӱдыкшӧ. Икымше уремыштыже 414 метр кужытышто асфальт мучко тӧргалтын. Лаке-влак палемдыме норматив деч ятырлан кугу улыт. Чехов уремысе 394 метр кужытышто корно тыгаяк начар.

Районын прокуратуржо Козьмодемьянск олан администрацийжым начар корнылам виеш тӧрлыкташ да изи архитертур формым шотыш кондыкташ верысе судыш искым пуэн. Суд тудым чынлан шотлен да пунчалын: олан администрацийже 2017 ий 1 сентябрь марте кӱшнӧ каласыме пу кӱварым да тошкалтышым, 2018 ий 30 апрель марте корным олмыктен шуктышаш. Судын решенийжын закон вийым налмыже деч вара ик тылзе жапыште Чехов урем ошма деч эрнышаш.

Козьмодемьянск олаште да Курыкмарий районыштыжат корным суд гоч олмыктыктымо але угыч ыштыктыме у огыл. Суд ончычат тыгай пунчалым ик гана веле огыл луктын. Илен шуыныт, коеш.

А.АНДРЕЕВ.

Опубликовать в Одноклассники

Добавить комментарий