«Образований» национальный проектын «Образованийын школ системыжым уэмден вияҥдымаш» федерал проектше дене келшышын тений Марий Элыште куд общеобразовательный организацийым олмыкташ палемденыт. Нунын кокла гыч иктыже – Волжский район Пӧтъял кыдалаш школ. Шинчымаш кече пайрем ты тунемме верыште поснак куанле лийын – йоча-влакым уэмдыме школ вашлийын.
2 сентябрьыште ӱдыр-рвезе-влакым Шинчымаш кече дене саламлаш Марий Эл Кугыжаныш Погынын депутатше Лариса Яковлева миен.
– Школын уста коллективше дене пырля мыят куанем! Йоча, ача-ава да туныктышо-влак, икманаш, верысе калык тыште ик еш семын келшен ила. Капитально олмыктымо деч вара школ уэш шке омсажым почын. Чылажат мотор, ару! Тидым тыште шукертсек суленыт. Тыге илыман, тыге пашам ыштыман», – возен шке соцлаштыкыштыже Лариса Николаевна.
Тунемме верым капитально уэмдыме пашам «Антикор Строй Групп» жапыштыже шуктен.
Ты школ дене кылдалтше эше ик уверже – тений гыч тыште агрокласс почылтеш. Ты шотышто тунемме вер ден Юл кундем кугыжаныш технологий университетын Йошкар-Оласе аграрный колледжше дене ойпидыш ышталтын. Агроклассыш коштшо-влак инженер-технический дисциплиным келгынрак тунемме деч посна кызытсе агропромышленный комплекс дене лишкырак палыме лийыт.
Г.Кожевникова
Фотом Л.Яковлеван соцкылысе лаштыкше гыч налме
