Марий Элым вуйлатышын «Таза республик» проектше кеҥеж мучко пашам ыштыш. Верысе калыкын тазалыкше верч тыршымаш регионысо правительствын ик эн ончыч шуктымо пашажлан шотлалтеш.
31 августышто Йошкар-Оласе 3-шо №-ан поликлиникын специалистше ден волонтёр-медик-влак Тазалык пунктым рӱдоласе Дубки микрорайонышто почыныт.
Ончылгоч увертарымым ужын, калык Лебедев уремысе 37-ше Б №-ан пӧрт кудывечыш диспансеризацийын икымше йыжыҥжым эрташ эрденак погынен. Пациент-шамыч вӱрысӧ сакыр ден холестеринын чотыштым, шинча кӧргысо да вӱргорно давленийын кугытыштым, антропометрический показательыштым рашемденыт, спирометрий ден ЭКГ-ым эртеныт, грипп ваштареш прививкым ыштыктеныт, ешартыш шымлымашлашке направленийым налыныт.
Тиде кечын оласе калык деке социально кӱлешан проект-влакын координаторжо Ренат Магсумов ушнен.
– Тазалык пунк Йошкар-Олаште илыше-влакын кудывечышкыштак толеш да ныл шагат пашам ышта. «Таза республик» проект – кугыжаныш велым шуктымо кӱлешан паша, вет таза айдеме – тиде таза еш, таза ола, таза регион, таза эл. Марий Элым вуйлатыше Юрий Зайцевын тыршымыж дене рӱдоласе калыклан шке тазалыкым кӱлынак эскераш сай йӧн ышталтын, – палемден тудо.
Маргарита ИВАНОВА
«Марий Эл» увер агентствын фотожо
