Марий Эл Республикын шымше гана чумырымо Кугыжаныш Погынжын 2 мартыште эртыше кумло визымше сесийыштыже депутат-влак 22 йодышым онченыт.
Ты кечын пеҥгыдемдыме нормативный правовой акт-влак кокла гыч шукыжым республикын кызыт вийыште улшо законжо-шамычым федеральный законодательствылан келшышым ыштыме шот дене ямдылыме. Тыге, мутлан, 16 ияш марте ийготан (але общеобразовательный организацийым тунем пытарыше) йочалан республикын бюджетше гыч тылзе еда тӱлыман пособий дене кылдалтше законын положенийже вийжым йомдарен. Тидыже тений 1 январь гыч йочам ыштыме да воспитатлыме шотышто универсальный пособийым илышыш пуртымо дене кылдалтын. Тудо ынде ӱдырамашын мӱшкыраҥме жапше гыч икшывын 17 ийым темымыж марте ойыралташ тӱҥалеш. Верысе шкевиктем органлашке сайлымаш нерген законышкат экстремизм сынан да ийготыш шудымо-влак шотышто преступленийым ыштымылан судитлыме еҥ-шамычлан у чарак-влакым пуртымо, депутатыш баллотироватлалтше-шамычлан йодмаш пелен утларак документым пышташ ыштыме, йот агентлан шотлалтше сайлыше гражданин шотышто положенийым вашталтыме. Культур, тӱрлӧ кӱкшытан сайлымаш, административный правонарушений, ийготыш шудымо-влакын пашашт да нунын праваштым аралыме шотышто комиссий-шамычын пашашт нерген республиканский закон-влакын южо положенийыштым федеральный законодательстве дене келыштарыме.
Депутат-шамыч мланде дене кылдалтше кок законыш вашталтышым пуртеныт. Икымшыже кугу инвестиций проектым илышыш пурташ палемдыше юридический лица-влаклан мланде участкым арендыш налме нерген ойпидышым торг деч посна ышташ правам пуа. Кокымшыжо ялозанлык пашам шукташ ойырымо мланде участкын палемдыме почеш огыл кучылталтмыж годым тудым озаж деч поген налме негыз да ужалыме правил-шамыч дене палдара.
Марий Эл правительствын темлымыж почеш боевой действий-влакын ветераныштлан юридический полышым яра налаш правам пуымо.
Кугыжаныш Погын Волжск оласе шкевиктем органлан арака, наркотик да моло аяр дене руштшо-шамычлан полышым пуымо пашам ӱшанен. Тиде олаште республикыштынажат тыгай профилян икымше специализироватлыме тӧнежым почаш палемдыме. Тудын пашажым регионын Паша да социальный аралымаш министерствыже курироватлаш да контролироватлаш тӱҥалеш.
Заседанийыште Марий Элысе элкӧргӧ паша министр Андрей Вырвич органын эртыше ийысе пашаж нерген отчётым ыштен. Мутшо почеш, 2022 ийыште республикыштына оперативный обстановко удажак огыл лийын, агыме, пуштмо, виешлыме шотан преступлений-влак шагалемыныт, тыгодымак увер технологий дене пайдаланен шуктымо, транспортым шолыштмо, тазалыклан шоненак зияным ыштыме гай преступлений-шамыч шукемыныт. Министр ведомствышто кадр ситыдыме, поснак районлаште участковый инспектор-шамычлан кабинетым ойырен кертдыме, калык дружинын еҥже-шамычлан полшаш кӱлмӧ йоыдшламат тарватен. А депутат-влак «Редан» ЧВК дене кылдалтше ситуаций, МВД пелен тунемме рӱдерын пашажым организоватлыме, калыкын пурлмывер-шамычым петыраш йодмыж шотышто мо ышталтме нерген умылкаленыт.
Кугыжаныш шотлымо палатын 2022 ийысе паша лектышыж дене тиде органын председательже Илья Акчурин палдарен. А парламентын председательже Анатолий Смирнов Марий Эл Республикын шымше гана чумырымо Кугыжаныш Погынжын пашаж нерген докладым ыштен. Ӱмаште 11 сессий, Кугыжаныш Погын президиумын 31 заседанийже, кандаш Депутат кече, комитет-шамычын 139 заседанийышт, пашаче группо-влакын 11 заседанийышт лийын, республик кӱкшытан 64 законым, ты шотыштак Марий Эл Конституцийыш тӧрлатымашым, пеҥгыдемдыме.
Сессийыште тыгак Медведево судебный районын 41-ше №-ан судебный участкыжын мировой судьяжлан Алексей Артизановым палемдыме, Кугыжаныш Погынын депутат-влакын доход нерген пуымо уверыштын чын улмыштым тергыме шотышто комиссийыш кандидат-шамычым пеҥгыдемдыме, 13-шо №-ан Строительный ик мандатан сайлыме округ деч депутат, марий парламентыште ЛДПР фракцийым вуйлатыше Антон Мирбадалевын депутат полномочий деч жап деч ончыч утараш йодмыж дене келшыме.
Кугыжаныш Погынын кумло визымше сессийыштыже Марий Эл Республикын 11 законжым да Кугыжаныш Погынын 25 пунчалжым приниматлыме.
М.ИВАНОВА
Фотом Марий Эл Республикын Кугыжаныш Погынжо деч налме
