8 июльышто Сахалиныште «Архипелаг» проектым ыштыме да тунемме кумдык пашам ышташ тӱҥалын. Тудо ты гана Российын 78 регионжо гыч 4,5 тӱжем участникым чумырен. Нунын коклаште – Марий Элын делегацийже.
21 июль марте эртыше мероприятийыште Бауман лицейысе «Кванториумын» да «Волгенче» рӱдерын педагогшо-влакын вуйлатымышт почеш мемнан команде спорт ден технологий таҥасымашлаште, гражданский тунеммаште да моло направлений дене моштымашым ончыктат. Тыгак участник-шамычым элыштына ыштен лукмо 30 утла тӱрлӧ кызытсе оборудований дене палдарат, теҥыз дроным тергымашым да молымат ончыктат.
Кажне ийын эртаралтше «Архипелаглан» ты гана арам огыл Сахалиным ойыреныт: верысе калык озанлыкыште ятыр ий беспилотникым пайдалын кучылтыт. Тудын полшымыж дене, мутлан, чодыра пожарм эскерат, медицине тӧнежлаш биоматериалым шупшыктат.
Г.Кожевникова
Фотом Марий Эл Образований да науко министерствын сайтше гыч налме
