тыге ойла республикысе Марий тӱвыра рӱдер пелен идалыкат пеле ончыч чумырымо марий хор вуйалтыше Наталья Мушкина.
Самырык коллектив профессиональный композитор-влакын мурыштым йоҥгалтарыме корным ойырен налын. Тачысе кечылан тушко 14 ӱдырамаш ушнен. 10 мурым сценыш лукташ ямдылен шуктеныт.
Наталья шкеже Шернур посёлкышто шочын кушкын, Йошкар-Оласе музыкальный училище деч вара А.К.Глазунов лӱмеш Петрозаводскысо кугыжаныш консерваторийын теоретико-дирижерский факультетшым. Финн-угор калык-влак музык кафедрыште шинчымашыжым нӧлтен. 20006 ий гыч В.М.Васильев лӱмеш Йылмым, историйым да сылнымутым научнын шымлыше марий институтышто этнологий пӧлкан специалистше, марий калыкын музыкальный да муро йӱлажым, профессиональный музыкальный культурым шымла. Олыкмарий муро-влакым чумырымо кок сборникым ямдылен луктын. Ӱдыр шкеже теоретик семын тунемын гынат, фортепияно, флейте дене шокта.
Тӱҥ пашажак сем тӱня, муро дене кылдалтын да санденак профессиональный композитор-влакын марий произведенийыштым тӱшкан мурымо коллективым чумыраш кумылжо лектын. Вет тыгайже Йошкар-Олаштына таче уке. Пытартышыже, Сеҥымашын ХХХ идалыкше лӱмеш пеленысе «Эрвий» ансамбль лийын, очыни.
Наталья шкежак коллективым чумырымо нерген Марий Эл радиош уверым пуэн. Тудын почешак мураш кумылан ӱдырамаш-влак толаш тӱҥалыныт. Тыге варажым Марий тӱвыра рӱдер пелен репетицийым эртараш тӱҥалыныт. Хорын икымше выступленийже кодшо ийын октябрьыште эртыше «Угинде» пайремыште лийын. А кызыт ынде рӱдерын эртарыме кажне мероприятийышкыже ушна манаш лиеш.
Коллективын усталыкшат кушкеш. Ӱдырамаш-влак репетицийышкат кумылын коштыт. Южышт шукертак тӱрлӧ коллективыште муреныт, а южышт – йӧршеш уке. «Светлана Петровам, Мая Ахметяновам, Зоя Королевам палышыжат улыт, очыни», – ойла Наталья.
Южгунам хор калык мурымат мура. А теве Сеҥымаш кечылан рушла гыч марлаҥдыме муро-влакым йоҥгалтарыш. Фонограммым шке гыч оксам поген ыштат. Сергей Пчелкин, Александр Куприянов тыште полшат. Интернет гычат фонограммым кучылтыт.
«Ме эше пеш самырык улына. Арнялан кок гана Калык тӱвыра пӧртын кумшо пачашыштыже погынена. «Мыйын шонымаште мемнан эше чылажат ончылно. Марла мураш кумылан-влакым шкенан деке вучена», – каласыш мучашлан Наталья.
С.Носова
Снимкыште: марий хор
Авторын фотожо
