Йошкар-Оласе медицине колледжыште выпускной кас лийын.
Медколледж да тудын Волжск оласе филиалже дене 318 специалист: 208 медсестра, 69 фельдшер, 23 фармацевт да 18 акушерке – чеверласеныт, тыгодым 46 еҥ профессиональный корныш йошкар диплом дене лектын.
– Мый тыланда профессийлан ӱшанле лияш тыланем, – торжественный мероприятийыште манын медколледжын директоржо Леонид Рыжков. – Тендам республикнан медицине организацийлаштыже изин-кугун вучат, да тушто чыланат сай шинчымашдам ончыктеда манын ӱшанена. Таза да пиалан лийза, чыла шонымашда шукталтше!
Тазалык аралтыш министерствын кугыжаныш граждан службо да кадр паша пӧлкажын начальникше Елена Рокинат выпускник-шамычлан чапле карьер ден пиалым, кумда илыш корнышто шке верым муаш тыланен.
318 самырык медик – тиде шукат, шагалат огыл, но республикнан медицине организацийлашкыже пашам ышташ чыланат каят мо? Илена – ужына.
М.ИВАНОВА
