Марий Элым вуйлатыше Юрий Зайцев республикынан социальный пашаеҥже-влакым профессионал пайремышт дене саламлен.
Пайремле вашлиймаш Э.Сапаев лӱмеш опер да балет кугыжаныш академический театрыште лийын. Регионым вуйлатыше социальный сферыште тыршен пашам ыштыше-влаклан кугыжаныш наградым кучыктен.
«Тендан пашада – моткоч кӱлешан. Те нелылыкыш логалше еҥ, еш, илалше, шкетын илыше, начар тазалыкан-влаклан кугу полышым пуэда. Тыгай поро шӱм-чонан улмыланда тауштем», – каласен Юрий Зайцев.
Погынышо-влакым пайрем дене видео йӧн полшымо дене Россий Федераций Правительстве председательын алмаштышыже Татьяна Голикова саламлен. «Лач те илышыште нелылыкыш логалше айдеме деке эн ончыч миеда да полышым пуэда. Пашада профессионализмым веле огыл, поро шӱм-чонан, чытышан лияш йодеш», – палемден тудо.
Таче Марий Элын социальный аралымаш системыже – ик ой ден да тыршен пашам ыштыше команде: 57 тӧнежыште 5 тӱжем наре профессионал тырша. 2025 ийыште социальный сферлан калыклан полышым пуымо пашам вияндаш 10 миллиард наре теҥгем ойырымо. Ӱмаште 13 тӱжем наре ешлан регионысо мере-влаклан (шуко шочшан еш гыч йочан тунеммыжлан компенсаций, «Социальная няня» услуго, шочшо азалан пӧлек) кӧра полшымо. Тыгак 1,5 тӱжем социальный контрактым ыштыме.
Мероприятийыште Юрий Зайцев социальный отрасльын эн уста пашаеҥже-влаклан кӱкшӧ наградым кучыктен.
Социальный пашаеҥ-влакым профессионал пайремышт дене тыгак Марий Элын Кугыжаныш Погынжын председательже Михаил Васютин, республикын правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов, Йошкар-Ола да Марий митрополит Иоанн, регионын паша да социальный аралымаш министрже Елена Таникова саламленыт.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Марий Элым вуйлатышын пресс-службыж гыч налме.
