Эртыше арня Россий мучко Туныктышын кугу арняже семын эртен. Тудын кышкарыштыже мемнан республикыште тӱрлӧ мероприятий лийын. Иктыже – 4 октябрьыште Я.Эшпай лӱмеш Марий кугыжаныш филармонийыште туныктышо-влаклан пӧлеклалтше пайрем концерт.
Эн ончычак погынышо-влакым Марий Элым вуйлатыше Юрий Зайцевын лӱмжӧ дене регионын образований да науко министрже Лариса Ревуцкая саламлен. Саламлымаште тыге возымо: «Пагалыме туныктышо да туныктымо пашан ветеранже-влак! Октябрь – аклаш лийдыме пашаланда таушташ сай йӧн. Уло шӱм-чон дене профессионал пайремда дене саламлем! Тыршымашда ден порылыкдан чекыштат уке. Те туныктышо гына огыл, а ончыкылыкым ыштыше улыда. Йоча-влакым да самырык тукымым уым почаш, у сеҥымашыш шуаш кумылаҥдеда. Ончылныда шуко задаче шындалтеш, у тунемме стандарт-влак илышыш пурталтыт, туныктымо технологий вашталт толеш, тунемме программе уэмдалтеш. Туге гынат туныктышын талантшым нимогай у сервис дене алмашташ ок лий. Профессийдан престижше кугыжанышнам вуйлатыше Владимир Владимирович Путинын полшымыж дене пеҥгыдем толеш. Образований системым вияҥдаш республикыштына шуко ышталтеш. Пашалан ӱшанле улмылан, тыршымылан да тунемше-влакым йӧратымыланда кугу тау! Те шинчымашым веле огыл пуэда, тыгак кушкын толшо тукымын шӱм-чон поянлыкшым пойдареда, тудлан чын корным ончыктеда. Пеҥгыде тазалыкым, пиалым да чыла сайым тыланем, пагалыме педагог-влак!»
Лариса Анатольевна палемден:
– Туныктышо – йочалан шинчымаш тӱняш корным почшо айдеме. Лач те айдемын тӱняумылымашыжым вияҥдеда. Таче тиде мемнан обществыште – аклаш лийдыме паша. Пагалыме коллеге-влак, Марий Эл правительстве республикысе образований системылан полша да кажныдан пашажым акла. Ме тендан да тунемшыда-влакын сеҥымашышт дене кугешнена. Тидлан таум посна каласыме шуэш. Марий Элым вуйлатыше Юрий Викторовичын поро тыланымашышкыже ушнен, тыланда тазалыкым, тынысым, йоча-влакын йӧратымашыштым тыланем, вет шке йӧратымашдам икшыве-влаклан кажне кечын пуэда. Пайрем дене!»
Погынышо-влакым тыгак Марий Эл Кугыжаныш Погынын председательже Михаил Васютин саламлен. Тудо тыге манын: «Шергакан туныктышо, ача-ава-влак. Таче мемнан шуко калыкан кугу элнан чыла кундемыштыже тыгай еҥ-влакым саламлат, кудыштын кидыштышт мемнан ончыкылыкна. Пагалыме Лариса Анатольевна, пагалыме туныктышо да туныктымо пашан ветеранже-влак! Марий Эл Кугыжаныш Погынын лӱмжӧ да шке лӱмем дене профессионал пайремда дене саламлем. Туныктышо лияш – профессий гына огыл, тиде – илыш. Тудо шуко вийым, кугу тыршымашым йодеш. Мемнан республикыште чынжымак талантан, пашаштым йӧратыше педагог-влак тыршат. Нуно жап деч почеш огыт код, санденак, кызытсе технологийым туныктымо пашаштышт моштен кучылтыт, авторский разработкым ямдылат. Таче туныктышо-влаклан пашам ышташ, тыгак моштымашыштым вияҥдаш йӧн лийже манын кугыжаныш кучем велым кугу тӱткыш ойыралтеш. Пагалыме педагог-влак, тыршен пашам ыштымылан, кугу чытышлан да профессийлан ӱшанле улмылан тау! Тек йоча-влакым йӧратыме шижмаш эреак чоныштыда ила, нуным туныкташ да шкежат тунемаш кумылда, тыгак профессионал могырым у кӱкштытыш шуаш шонымашда нигунам огеш йом. Пеҥгыде тазалыкым да сеҥымашым тыланем!»
Пайрем дене саламлыме да поро тыланымаш деч посна ты кечын филармонийын сценыштыже кундемнан ик эн виян туныктышыжо-влаклан кӱкшӧ наградым кучыктеныт. Тений «Марий Эл Республикын Калык туныктышыжо» чап лӱм дене Моркысо 1-ше №-ан школын туныктышыжо София Никитинам палемденыт. Тиде уста педагог туныктымо пашаште чылаже 39 ий тырша.
Марий Элым вуйлатышын Тауштымашыжым Шернур район Ӱлыл Кугэҥер школышто тыршыше Светлана Петухова ден Марий Турек школын педагогшо Ирина Ложкиналан пуэныт.
Россий Просвещений министерствын «Просвещенийын отличникше» почётан знак дене Курыкмарий районысо Кӓтӓ Шошмар школын педагогшо Галина Алгаскина палемдалтын.
Марий Эл правительствын Чап грамотшым Параньга районысо Физкултур да спортым вияҥдыме рӱдерын тренерже Сергей Иванов ден Бауман лицейын туныктышыжо Надежда Нагорина налын.
Россий Федерацийысе образований сферын почётан пашаеҥже лийыныт: Гольсара Хатиуллина (Морко район Нурӱмбал школ), Ильмира Хисимова (Йошкар-Оласе 8-ше №-ан «Дружная семейка» йочасад) да Татьяна Шембулатова (Медведево район Азаново школ).
Россий Федераций Просвещений министерствын Чап грамотыж дене палемдалтыныт: Татьяна Ахматынова (Волжский район Приволжский посёлкысо 2-шо №-ан «Рябинка» йочасад), Татьяна Чернова (Кужэҥерысе 2-шо №-ан школ).
Икмыняр уста педагоглан ты кечын Марий Элым вуйлатышын Тауштымашан серышыжым да 50 тӱжем теҥгелан сертификатым, тыгак республикын Образований да науко министерствыжын Чап грамотшым кучыктеныт.
Снимкыште: «Марий Эл Республикын Калык туныктышыжо» София Никитина (пурлаште)ден республикым вуйлатышын Тауштымашыж дене палемдалтше Светлана Петухова.
Г.Кожевникован фотожо.
